Telja sig vera með höfuð­paur fíknefnahóps í haldi

Þetta kemur fram í gæsluvarðhaldsúrskurði Héraðsdóms Reykjavíkur sem Landsréttur hefur staðfest. Þar er fjallað um umfangsmiklar lögregluaðgerðir sem hafa meðal annars snúið að innflutningi fíkniefna með skemmtiferðaskipi.

Rak hópinn eins og fyrirtæki

Í greinargerð lögreglu segir að uppbygging og hlutverkaskipting hópsins hafi verið þaulskipulögð.

Fram kemur í úrskurði héraðsdóms að þessi meinti höfuðpaur hafi verið í spjallhóp ásamt sjö öðrum á samskiptaforritinu Signal, en þar hafi allir gengið undir leyninöfnum. Maðurinn sem og annar einstaklingur eru álitnir vera höfuðpaurar hópsins, en lögreglan telur þá eiga fíkniefni sem lagt hefur verið hald á í málinu.

Rannsóknargögn lögreglu sýni að maðurinn sé yfir allri starfseminni í umræddum söluhóp. Hann hafi rætt starfsemina eins og um fyrirtæki væri að ræða og talað um hlutverk allra í hópnum.

Minnst er á að þegar kona hafi verið handtekin vegna málsins hafi maðurinn talað um að hann væri ekki búinn að undirbúa hana nægilega vel yrði hún tekin.

Fundu fullt af dópi en aðallega laktósa

Málið er umfangsmikið miðað við lýsingar lögreglu í úrskurðinum. Í lok september á síðasta ári fór lögreglan á heimili áðurnefndrar konu og lagði hald á um það bil 240 grömm af kókaíni, 120 grömm af amfetamíni, og 4,8 kíló af laktósa. Þá uppgötvaði lögreglan spjallhópinn á Signal.

Í kjölfarið fékk lögreglan upplýsingar um aðra geymslustaði fíkniefna. Fyrst hjá manni, svo hjá syni mannsins, síðan hjá konu sem er móðir annars manns sem er grunaður í málinu auk fleiri staða.

Í húsleit á þessum stöðum fundust samtals tæplega 1,8 kíló af kókaíni, tæpt kíló af amfetamíni, tæp fimmtíu grömm af metamfetamín-kristöllum, sem og tæp fjögur kíló af laktósa.

Könnuðust ekkert við peningana

Í greinargerð lögreglu er meðal annars farið yfir hvernig maðurinn skipulagði peningaþvætti með því að láta poka troðfulla af peningum ganga á milli manna. Lögregla hafi meðal annars haft afskipta af manni sem hafði fjölnota höldupoka með rúmum tólf milljónum króna í meðferðis. Sá hafi sagst ekki hafa athugað hvað væri í pokanum og sagst ekki vita hver ætti peningana þegar lögregla spurði hann um þá.

Þá hafi annar maður verið stöðvaður á leið úr landi með rúmar sextán milljónir króna í reiðufé í farangri. Sá hafi sömuleiðis sagst ekkert kannast við peningana þegar hann var spurður á vettvangi. Við síðari yfirheyrslu hafi hann aftur á móti sagst hafa fengið val, annað hvort borgaði hann fíkniefnaskuld upp á 900 þúsund krónur eða að hann færi með peningana úr landi.