Að forðast að háma í okkur eftir vinnu

Sem þó mjög margir sleppa.

Næst er það áherslan á að borða hollt og reglulega yfir daginn.

Sem þó mörgum tekst sjaldnast.

Því já, stundum eru vinnudagarnir okkar einfaldlega þannig að okkur finnst við hafa of mikið að gera til að borða.

Höfum ekki tíma.

Finnum ekki fyrir svengdinni.

Hám-borðum þegar við loksins getum borðað.

Úff…. er nema von að líkaminn upplifi sig undir álagi og uppþemdur.

Staðreyndin er samt sem áður sú að ef við gefum okkur ekki tíma til að borða yfir vinnudaginn, er svengdin einfaldlega orðin svo mikil eftir vinnu að við ráðum ekki við okkur þegar við loksins komumst í mat. 

Heill kexpakki? Ekkert mál...

Og á endanum verður þessi hringrás að vana!

Allt snýst þetta þó um að finna þennan gullna meðalveg sem gerir okkur kleift að fylgja eftir þeirri rútínu sem við viljum helst fylgja eftir.

Sem sjaldnast felur þá í sér boð, bönn eða öfgafull markmið um lífstílsbreytingar.

Auðvitað eru alls kyns ráð sem geta hjálpað okkur með matarræðið ef það er í rugli á löngum og álagsmiklum vinnudögum. 

Til dæmis að undirbúa máltíðina fyrirfram og taka með sér nesti, vera alltaf með smá próteinbar eða ávöxt við höndina (epli, banani), muna eftir vatnsbrúsanum (alltaf) og láta símann um að minna okkur á nokkra mínútna pásu yfir daginn til að koma einhverju góðu ofan í okkur.

Og það eru líka alls kyns góð ráð til um það, hvernig við erum líkleg til að ná árangri og þeim markmiðum sem við setjum okkur.

Margir sem eru hins vegar fastir í þessari hringrás að gleyma sér yfir daginn og háma síðan í sig alls konar eftir vinnu, segja erfiðast að muna eftir því að borða.

Eða að muna eftir markmiðinu um að vilja borða.

Já: Að muna eftir máltíðinni getur verið áskorun út af fyrir sig. Sem þó er það eina sem getur forðað okkur frá því að verða of svöng eftir vinnu.

Hér eru nokkur góð ráð sem geta hjálpað okkur út úr vítahringnum:

• Settu þér raunhæft markmið: Þú ætlar að borða eitthvað yfir daginn, annað er of óhollt.
• Segðu vinnufélögunum frá þessu markmiði.
• Notaðu klukkuna í símanum til að minna þig á matarpásur.
• Vertu undirbúin með mat/máltíð/ávexti/nesti. Ekki ætla þér að muna eftir því að borða en eiga þá eftir að ákveða hvað.
• Farðu yfir það í huganum hvenær þér líður best eftir daginn: Hvað borðaðir þú þá og hvenær?
• Skrifaðu á blað markmiðið þitt og hvaða langtímaáhrif þú vilt sjá koma út úr því.
• Vertu með markmiðið þitt sýnilegt í vinnunni, til dæmis gula minnismiða sem þú skilur og eru ekki truflandi fyrir annað starfsfólk né viðskiptavini.
• Fáðu vinnufélaga í lið með þér (skiptast á pásum?)
• Haltu utan um markmið og árangur með því að skrá niður í bók (daglega, annan hvern dag eða vikulega). Hvaða dagar voru til dæmis bestir/árangursríkastir? Hvað einkenndi þessa daga?
• Lærðu að forðast gryfjurnar þínar
• Hrósaðu sjálfum þér fyrir góðan árangur; Að setja sjálfan sig í forgang er árangur út af fyrir sig.