Hæglætisveður um helgina

Lovísa Arnardóttir skrifar 9. ágúst 2024 07:12

Skýjað með köflum og lítisháttar væta í dag. Vísir/Vilhelm

Um helgina verður hæglætisveður um helgina. Það verður skýjað með köflum og lítilsháttar væta af og til í flestum landshlutum og milt. Norðan til á landinu verður hins vegar fremur þungbúið og svalt í dag, en það ætti að birta til og hlýna þar á morgun. Þetta kemur fram í hugleiðingum veðurfræðings Veðurstofunnar.

Þar segir einnig að eftir helgi verði ekki sama hæglætisveðrið því djúp lægð verður líklega austan við landið á mánudag með strekkings norðanátt og rigningu austast, en hægari og úrkomulítið annarsstaðar. Það verður fremur svalt fyrir norðan og austan, en lægðin fjarlægist landið á þriðjudag og þá ætti veður að skána eitthvað aftur.

Á vef Vegagerðarinnar, umferðin.is, má sjá að greiðfært er um allt land en best er að fylgjast með tilkynningum þar um framkvæmdir og færð. Nánari upplýsingar um veður má finna á vef Veðurstofunnar.

Veðurhorfur á landinu næstu daga

Á laugardag:

Suðvestlæg eða breytileg átt, 3-8. Skýjað með köflum og líkur á síðdegisskúrum, einkum inn til landsins. Þokuloft við austurströndina. Hiti 8 til 16 stig, svalast við austurströndina.

Á sunnudag:

Suðaustlæg átt, 3-8, skýjað með köflum og skúrir á víð og dreif, einkum síðdegis.

Þokuloft við austurströndina.

Hiti 7 til 17 stig, svalast við austurströndina.

Á mánudag:

Gengur norðaustan 8-15 m/s með rigningu, jafnvel talsverðri á Austurlandi, en úrkomuminna vestanlands. Hiti 8 til 15 stig, hlýjast sunnan- og vestanlands.

Á þriðjudag:

Austlæg átt með rigningu, jafnvel talsverð suðaustanlands, en skýjað með köflum og úrkomulítið fyrir norðan. Hiti 8 til 18 stig, svalast við austurströndina og á Ströndum.

Á miðvikudag:

Suðaustlæg eða breytileg átt, væta af og til, en bjart með köflum fyrir norðan. Hiti breytist lítið.

Á fimmtudag:

Norðlæg eða breytileg átt og dálítil rigning í flestum landshlutum. Kólnandi, einkum norðan- og austanlands.

Veður Færð á vegum