Tveggja milljarða gjald­þrot Ingvars Jónadabs tók tíu ár

Í auglýsingu í Lögbirtingablaðinu í dag segir að með úrskurði Héraðsdóms Reykjavíkur uppkveðnum 27. febrúar 2014 hafi bú Ingvars Jónadabs verið tekið til gjaldþrotaskipta.

Skiptum á búinu hafi verið lokið þann 15. júlí 2024. Upp í kröfur samkvæmt 113. grein laga um gjaldþrotaskipti og fleira hafi greiðst tæplega 389 milljónir króna eða sem samsvarar 18,7 prósentum. Lýstar kröfur samkvæmt greininni voru tæplega 2,1 milljarður króna.

Tók við stöndugri heildsölu af föður sínum

Ingvar Jónadab var umsvifamikill athafnamaður á árunum fyrir bankahrun en er þekktastur fyrir að hafa rekið heildsöluna Karl K. Karlsson lengi. Faðir hans, Karl K. Karlsson, stofnaði fyrirtækið árið 1946.

Félagið varð andlag málaferla eftir að Ingvar Jónadab var úrskurðaður gjaldþrota. Í frétt DV frá árinu 2016 segir að ráðstöfun Ingvars Jónadabs á hinum ýmsu eignum til eiginkonu hans hafi verið rift með dómi Héraðsdóms Reykjavíkur.

23 félög undir

Ingvar Jónadab hefði afsalað eignum sem samanstóðu af hlutum eða öllu hlutafé í 23 einkahluta- eða hlutafélögum, tveimur íbúðum í London, fjórum fasteignum hér á landi og þremur bifreiðum. Meðal félaganna var heildverslunin. 

Eiginkonu hans var gert að skila þrotabúinu öllum eignunum og að greiða búinu allt að 200 milljónir króna til að mæta afföllum á eignasafninu.