Allt bendir til þess að Liverpool missi Trent í sumar

Real Madrid hefur sett enska landsliðsbakvörðinn Trent Alexander-Arnold í efsta sætið á óskalistanum sínum. Þetta kemur fram í frétt hjá The Athletic.

Á sama tíma lítur út fyrir að Alexander-Arnold ætli ekki að framlengja samning sinn við uppeldisfélagið.

Það mun eflaust að hjálpa honum að taka þá ákvörðun að spænskir miðlar segja að hann sé í forgangi hjá Evrópumeisturunum.

Miðað við fréttir frá Spáni þá er orðið langlíklegast að samningur Trent renni út í júní og að hann fari til Real Madrid á frjálsri sölu alveg eins og Frakkinn Kylian Mbappé í sumar.

Trent er uppalinn hjá Liverpool og hefur spilað með aðalliðinu undanfarin átta tímabil.

Hann hélt upp á 26 ára afmæli sitt á dögunum og er að detta inn á bestu árin á sínum ferli.