Svan­dís tekur upp hanskann fyrir kennara

Því sé haldið fram að veikindahlutfall sé hátt og að þeim hafi fjölgað hraðar en nemendum, að vandinn sé ekki aðbúnaður eða aðstæður, heldur hjá kennurum sjálfum. Svandís segir þetta ekki rétt. Það gerir hún í aðsendri grein í Morgunblaðinu sem hún birtir sömuleiðis á Facebook-síðu sinni. 

Framkvæmdastjóri viðskiptaráðs sagði í gær grunnskólakerfið hérlendis brotið og einsleitt. Lausnin við því sé ekki að setja meira fjármagn inn í kerfið heldur að laga það innan frá. Hann segir einkarekna grunnskóla mögulega lausn við vandanum.

„Eðlilegt er að mörg spyrji sig: Hvert er planið með þessum málflutningi? Hvaða markmiðum er verið að reyna að ná fram með því að ráðast á kennarastéttina?“ spyr Svandís í grein sinni.

Hún segir það hræða þegar almannaþjónusta sé gagnrýnd frá hægri og það geti verið undanfari þess að markaðsöflum sé gefinn laus taumur. Menntakerfið megi hins vegar ekki verð „þeirri kredduhugsun að bráð“.

Breytt samfélag hafi breytt menntakerfinu

Hún segir menntakerfið í almannaþágu og að það verði að gefa kennurum verkfærin til að ná árangri en ekki „útmála þá sem sökudólga“.

„Breytt samfélag með aukinni fjölbreytni kallar á aukinn stuðning við kennara, ekki árásir, til þess að hægt sé að mæta börnum á þeim stað sem þau eru. Það er flókið verkefni að kenna nemendahópi þar sem fjöldi nemenda hefur annað móðurmál en íslensku, hópum þar sem fjöldi barna með ýmsar greiningar hefur aukist mikið síðustu áratugi. Samfélagsbreytingar af þessum toga færa skólum verkefni sem áður voru ekki til staðar. Því til viðbótar koma samfélagsmiðlar og gliðnun samfélaga,“ segir Svandís í grein sinni

Það þurfi að styðja betur við skólakerfið og að sveitarfélögin verði að hafa tekjustofna til að standa undir þjónustunni.

„Í því verkefni má okkur ekki mistakast. Við viljum ekki feta í fótspor nágrannalanda okkar þar sem innviðir hafa verið einkavæddir í þágu fjármagns en ekki samfélagsins. Það sem við höfum verið svo stolt af, samfélag samstöðu, verður til í almennu skólakerfi. Þessu jöfnunarhlutverki verður að gefa gaum því það vegur þungt.“

Grein Svandísar er hægt að lesa í heild sinni hér.