„Hættan af þessum mönnum var þekkt”

Greint hefur verið frá því að maðurinn hefur áður verið dæmdur fyrir að hafa ráðist á móður sína og fyrir að stinga föður sinn. 

Afstaða vill í yfirlýsingu koma á framfæri alvarlegum áhyggjum í yfirlýsingu varðandi þetta mál, og annað þar sem einstaklingur er grunaður um nauðgun og líkamsárás skömmu eftir að hafa losnað úr afplánun.

„Hættan af þessum mönnum var þekkt og Afstaða búin að vara ítrekað við hvað myndi hugsanlega gerast og því hefði verið hægt að koma í veg fyrir að svona færi ef gripið hefði verið til viðeigandi aðgerða,“ segir í yfirlýsingu samtakanna.

Sjá nánar: Sonurinn áður stungið föður sinn í bakið

Þá segir einnig að þrátt fyrir ítrekaðar viðvarandi samtakanna og annarra sérfræðinga hafi verið skortur á úrræðum fyrir einstaklinga sem losna úr fangelsi en þurfa á sértækum stuðningi að halda til að tryggja bæði þeirra eigið öryggi og samfélagsins alls.

Afplánuðu fulla dóma

„Þetta úrræðaleysi hefur nú leitt til þess að tvö hörmuleg mál hafa komið upp,“ segir í yfirlýsingunni þar sem sérstaklega er tekið fram að mennirnir hafi báðir verið afplána fullan dóm, án reynslulausnar, vegna þekktrar hættu sem steðjaði af þeim.

Í yfirlýsingunni er bent á að sveitarfélög eiga samkvæmt lögum að bera ábyrgð á úrræðum fyrir fólk í þessari stöðu en að þau standi ekki undir því, sérstaklega ekki smærri sveitarfélög.

„Það hefur leitt til þess að einstaklingar með sértækar þarfir eru settir í aðstæður sem eru þeim og samfélaginu hættulegar. Afstaða hefur ítrekað bent á nauðsyn þess að bæta aðgengi að sérhæfðum búsetuúrræðum með sérhæfðu starfsfólki en ekkert hefur verið gert til að leysa þetta vandamál. Hættan varðandi þessa tvo einstaklinga var í raun fyrirséð og þeir eru aðeins hluti af örstækkandi hópi sem er á leið í samfélagið eftir afplánun dóma og enn fleiri eru þegar nú frjálsir í samfélaginu,“ segir í yfirlýsingunni.

Samtökin krefjast tafarlausra aðgerða.

„Stjórnvöld þurfa að bæta aðgengi að úrræðum fyrir einstaklinga sem losna úr fangelsi og tryggja að þeir fái þann stuðning sem þeir þurfa til að aðlagast samfélaginu á öruggan hátt. Ef ekki verður gripið til aðgerða nú þegar er hætta á því að fleiri hörmuleg atvik eigi sér stað.“