Höttur ekki lengi að finna mann í stað McCauley

McCauley var látinn taka poka sinn í gær en hann hefur ekki heillað í upphafi leiktíðar hjá Hattarmönnum. Hann spilaði sex leiki fyrir liðið í deildinni, skoraði í þeim 18,5 stig að meðaltali, tók 6,2 fráköst og gaf 1,3 stoðsendingar.

Héraðsbúar voru fljótir að finna annan Bandaríkjamann í hans stað og hafa samið við Justin Roberts. Sá er 26 ára gamall bakvörður. Robert hefur spilað í Norður-Makedóníu og Sviss síðustu ár eftir að hafa spilað fyrir Georgia State í háskólaboltanum vestanhafs.

Á síðustu leiktíð skoraði Roberts að meðaltali 26 stig í leik, tók fjögur fráköst og gaf 6,3 stoðsendingar með Union Neuchatel í Sviss.

Í yfirlýsingu Hattar segir að Roberts muni koma hingað til lands eftir helgi og því ljóst að hann spilar ekki leik liðsins við Stjörnuna í Garðabæ annað kvöld.

Höttur vann Íslandsmeistara Vals 83-70 fyrir austan í síðasta leik en hefur unnið þrjá og tapað þremur í fyrstu sex umferðum deildarinnar.