List Sísíar sam­einar húmor og hjarta­hlýju í nýju jóla­hefti

Í ár prýða jólamerkimiðarnir listaverk sem listamaðurinn Sísí Ingólfsdóttir gerði sérstaklega fyrir þetta tilefni. Sísí hefur stimplað sig rækilega inn í hjörtu landsmanna með margvíslegri listsköpun sinni, en er kannski frægust fyrir útsaumsverk sín þar sem hún biðst afsökunar á alls kyns hversdagslegum hlutum og uppákomum á gamansaman hátt. Verkin hafa slegið í gegn, enda nær Sísí að fanga þjóðarsálina í þeim á einstakan og skemmtilegan hátt. Miðarnir í ár eru byggðir á þessu skemmtilega þema.

„Ég var auðvitað mjög uppi með mér þegar Rauði krossinn bað mig um að gera jólaheftið í tilefni 100 ára afmælisins og mér hefur alltaf fundist það að teikna góð skemmtun,“ segir Sísi. „Ég er óafsakanlega tækniblind og vinn því allt á gamaldags hátt, með blað og penna. Það var eins með merkimiðana. Það var auðvitað ánægjulegt að fá að gera þetta verkefni, að fá að láta gott af sér leiða með því að gefa þessa vinnu. En það eru einmitt ótal margir sjálfboðaliðar starfandi hjá Rauða krossinum sem hjálpar að hjálpa öðrum um heim allan.“

Eins og fyrr segir eru jólamerkimiðarnir byggðir á afsakið þemanu sem hefur svo sannarlega slegið í gegn. Það lá því beinast við að þróa þá hugmynd áfram. „Nú hef ég verið að afsaka mig bróðurpart ævinnar svo það kemur mér nokkuð eðlislega. Ég hef einnig unnið mikið með textaverk undanfarinn ár og ekki síst hinar ólíklegustu afsakanir sem ég hef saumað út í allt mögulegt, frá nytjahlutum yfir í allt of stór útsaumsverk.

Sjálfri finnst mér alltaf skemmtilegast þegar fólk hefur húmor fyrir sjálfu sér og ekki síður þegar um fyrirtæki, stofnanir eða samtök eru að ræða þannig að þegar þau hjá Rauða krossinum voru til í hugmyndir mínar um valgreiðslur og að afsaka góðverk, þá var ég til í að teikna upp merkimiða og forsíðu jólaheftisins.“

Íbúar utan höfuðborgarsvæðisins geta nálgast jólaheftin í verslunum Kjörbúðar, Krambúðar og N1.

Jólaheftið minnir landsmenn á þá fjölbreyttu hjálparstarfsemi sem Rauði krossinn sinnir, bæði innanlands og utan. Með því að greiða fyrir merkimiðana er fólk að leggja sitt af mörkum til verkefna sem styðja þá sem eiga um sárt að binda – ekki síst yfir hátíðarnar. Sjálfboðaliðar Rauða krossins standa vaktina hjá Hjálparsímanum 1717 og á netspjallinu 1717.is allan sólarhringinn, alla daga ársins, þar sem ekkert mál er of stórt eða smátt. Með því að taka þátt í þessum áratugalanga sið halda landsmenn áfram að styðja það mikilvæga starf sem Rauði krossinn sinnir á hverjum degi.

En hvað skyldi vera helst framundan hjá Sísí á nýju ári?

„Ég er að reyna lifa meira eftir því sem ég segi við aðra, bæði með listinni og í daglegu tali. Sýna sjálfri mér þolinmæði og mildi, hætta að minnka mig og biðjast svo afsökunar á því. Nei, ég er samt ekki á meðvirkni námskeiði þó ég hefði eflaust gott af því.

Undanfarið ár er búið að vera allskonar og erfiðara en lagt var upp með fyrir ári. Heilsan hefur ekki verið mér hliðholl og þar sem ég á venjulega erfitt með að vera ekki út um allt og alls staðar með allt of marga bolta á lofti í einu þá er ég enn læra að hægja á mér. Afþakka góð tækifæri og spennandi boð, gera færri plön og ætla mér minna. Kannski læri ég það einn daginn. Suma daga er kannski bara nóg að anda, eða svo er mér sagt.“

Sísí segist samt ekki alfarið dottinn af baki og er aftur orðin heimavinnandi húsmóðir í úthverfi. „Ég er allt of mikill hugmyndarúnkari til þess, þó mér finnist fátt skemmtilegra en að hanga með börnunum mínum sjö, manninum mínum og að ógleymdum hundinum Krumma. Mig bókstaflega klæjar í puttana þegar ég hef ekki getað unnið í augnablik og verð þá að koma hugmyndum á blað eða frá mér með öðrum miðlum.

Það er ófátt á teikniborðinu á næsta ári og margar hugmyndir sem ég þarf að koma frá mér. Þær eru sennilega fleiri en dagar ársins leyfa konu að koma í framkvæmd en fyrst er að geta staðið í fæturna ögn lengur svo ég verð víst að sýna líkamanum þolinmæði. Afsakið heilsukomplexana.“