Málið orðið persónu­legt og erfitt fyrir í­búa Seyðis­fjarðar

Umsagnaferlinu lýkur í dag og þá leggst kerfið yfir það hvort þar séu ábendingar sem vert er að taka mark á. Benedikta Guðrún Svavarsdóttir er ábyrgðarmaður undirskriftasöfnunarinnar. Hún segir að þrátt fyrir það verði undirskrifalistinn opinn til áfram eða til 10. apríl.

„Við erum auðvitað í skýjunum vegna viðbragðanna og hversu mikillar athygli þessi barátta hefur notið,“ segir Benedikta en hún hefur nú barist í fjögur ár fyrir því að Seyðisfjörður fái að vera í friði fyrir sjókvíaeldinu.

„Meirihluti landsmanna er neikvæður gagnvart sjókvíaeldi, það liggur fyrir,“ segir Benedikta og vísar í skoðanakannanir. Hún segist ánægð með hversu mikillar athygli málið hefur notið. Og má í því sambandi nefna afdráttarlausa grein stjórnarþingmannsins Sigmundar Ernis Rúnarssonar sem fer ítarlega yfir málið.

Benedikta segir ekki eitt heldur allt sem setja megi út á þessa fyrirhuguðu framkvæmd sem er á vegum fyrirtækisins Kaldvík. „Það væri hægt að stoppa þetta einfaldlega á þeim forsendum að þetta kemst ekki fyrir í firðinum. En þeir vilja troða þessu einhvern veginn inn.

Dómharka og dylgjur

Þó meirihluti bæjarbúa hafi sýnt sig í að vera þessu andvígir eru vissulega Seyðfirðingar sem hafa tekið til máls og viljað halda því á loft að þeir séu hlynntir. Margrét Guðjónsdóttir er ein þeirra og hefur hún skrifað Facebook-pistil þar sem hún gagnrýnir ofsa í málflutningi náttúruverndarsinna. Pistillinn hefur notið nokkurs stuðnings.

„Ég tel að dómharka og dylgjur sumra þeirra er mest höfðu sig frammi í andstöðunni, hafi orðið til þess að ójafnvægi myndaðist snemma í umræðunni. Einstaklingar sem voru ekki mótfallnir fiskeldi héldu sig margir til hlés í opinberri umræðu vegna ofsa og persónuárása sem einkenndu umræðuna,” segir Margrét meðal annars í eftirtektarverðum pistli. 

Hún telur Vá hafa átt sviðið og talað sem hinn eini sanni málsvari íbúa Seyðisfjarðar en þar sé í raun um  áróðursvél að ræða, leidd af fólki sem býr ekki á Seyðisfirði!

„Ég hlakka til þess að fá nýja og kraftmikla starfsemi í fjörðinn. Ég gleðst yfir því að hafa tækifæri til að sækja um ný störf, ég gleðst yfir því að tugir einstaklinga sóttu um þau fiskeldisstörf sem nýlega voru auglýst á Seyðisfirði. Ég samgleðst þeim sem fengu störfin og ég er spennt fyrir hönd þeirra sem bíða eftir að geta sótt um síðar. Ég er spennt að sjá hverjir grípa tækifærin í afleiddri starfsemi og skapa þannig enn fleiri störf. Ég trúi því ekki að tilkoma fiskeldis verði á kostnað annarrar uppbyggingar í bænum,“ segir Margrét.

Búið að skipta bæjarbúum í tvö horn

Benedikta segir stöðuna þegar orðna persónulega og ömurlega en fyrirtækið hefur nú auglýst og ráðið í störf við starfsemina.

„Þetta er alltaf sama aðferðarfræðin,“ segir Benedikta og vísar í rómaða bók sem Andri Snær Magnason skrifaði og gaf út 2019; „Draumalandið – Sjálfshjálparbók handa hræddri þjóð“.

„Við erum að glíma við ofurefli og ekki hægt annað en vera með háværa rödd og leggja mikið á sig til að eiga möguleika á að snúa þessu við.“

Er bjartsýn á að ný ríkisstjórn stöðvi málið

Benedikta segist bjartsýn á að lyktir málsins verði með þeim hætti að horfið verði frá þessum fyrirætlunum. 

„Ef hin nýja ríkisstjórn horfir á öll þau gögn sem við höfum lagt fram. Það hefur verið boðið upp á sýndarsamráð trekk í trekk en ef ég væri í þessari ríkisstjórn vildi ég ekki bera ábyrgð á því að hleypa þessu leyfi í gegn. Það er mikilvægt að ríkið festi það ekki í sessi að það verði skaðabótaskylt gagnvart fyrirtækinu. Og það gerist, ef þeir veita þetta leyfi, fara inn í kauphöllina, þeir eru komnir með væntingar í sínum viðskiptum. En nú er hægt að bremsa.“

Benedikta segir ekki hægt að hafa þetta vofandi yfir samfélaginu lengi enn, það verður að klára þetta mál í eitt skipti fyrir öll.