Tjón víða í Norð­firði eftir öfluga vind­hviðu

Þar kemur einnig fram að rúður hafi brotnað í bíl við Kjörbúðina, í anddyri Verkmenntaskóla Austurlands og í strætóskýli auk þess sem rúða brotnaði í matsal Nesskóla. Frétt Austurfrétta.

Eins og 190 kílómetrar á klukkustund

Jóhann Tryggvason, húsvörður Verkmenntaskóla Akureyrar, var á svæðinu þegar rúðan brotnaði.

„Þetta er hviða sem kemur á mjög takmörkuðu svæði,“ segir hann í samtali við fréttastofu. Fólk sem hafi verið í um 200 metra fjarlægð hafi ekki orðið vart við hviðuna.

Hann telur að breiddin á svæðinu sem hviðan fór yfir gæti verið um 50 til 70 metrar. Þar séu allar skemmdirnar.

„Ofan frá fjalli og niður að sjó. Þetta var mjög staðbundið. En við erum að tala um 54 metra á sekúndu í hviðu. Það eru eins og 190 kílómetrar á klukkustund.“

Hlynur Sveinsson veðuráhugamaður varð þess var þegar gróðurhúsið fór á ferð í hviðunni í gær. Hann hljóp út ásamt fleirum til að tryggja að það fyki ekki út í sjó en segir það hafa verið flókið mál. Vindurinn hafi komið úr öllum áttum.

„Þetta eru einhverjar skrítnar aðstæður sem myndast hérna í firðinum í þessum suðsuðaustanáttum og vindurinn kemur úr öllum áttum. Þegar gróðurhúsið fauk á hliðina vorum við að reyna að halda við það en þá ætlaði það að fjúka í hina áttina,“ segir Hlynur.

Fólk fann víða fyrir hviðunni

Hann tekur undir með Jóhanni að hviðan hafi verið staðbundin en samt hafi fólk fundið fyrir henni víða í bænum og í sveitinni. Hviðan hafi mælst á þremur veðurmælum í sveit.

„Innst inni í sveit brotnaði rúða í traktor og bóndinn lýsir því þannig að hviðan hafi verið allt öðruvísi en allt annað sem var á ferðinni. Styrkurinn og áttin sem hún kom úr.“

Þá segir hann afar merkilegt að grenitréð hafi brotnað. Það sé líklega um 30 ára gamalt. Hann segir það heppnina eina að enginn hafi slasast í Nesskóla þegar rúðan brotnaði í matsalnum.

„Það er vatnsvél þarna sem krakkarnir nota reglulega til að fylla á vatnsbrúsana. Það er opnanlegt fag á glugganum sem sogast út. Þeir stíga frá krakkarnir við það. Svo kemur glugginn á fullu aftur og rúðan mölbrotnar,“ segir Hlynur.

Hlynur fylgist vel með veðrinu í Norðfirði og er með Facebook-hópinn Veðurstofa Norðfjarðar og vefsíðuna vedurhlynsi.com þar sem hann fjallar um veðrið.

Svipuð hviða 2022

„Ég mældi svipaða hviðu árið 2022 í svipuðum aðstæðum, sú var 61 metri á sekúndu,“ segir Hlynur.

Hann segir fáar hviður hafa farið yfir 35 metra á sekúndu og meðalvindurinn hafi ekki verið nema í kringum 15 til 20 metra á sekúndu. 

„Þetta eru mjög skrítnar aðstæður.“

Hann segir nokkuð algengt að vindur nái þessum mikla hraða í firðinum. Margar veðurstöðvar mæli mest 35 metra en það þurfi veðurstöðvar sem mæli sterkari vind á firðinum. Hann segir fólk vera með áhyggjur af veðrinu á morgun og hinn. Gefnar hafa verið út appelsínugular viðvaranir fyrir landið allt sem taka gildi klukkan 14 á morgun og gilda til miðnættis á fimmtudag.