Guð­rún boðar til fundar

„Nú styttist óðum í að Sjálfstæðismenn komi saman á landsfundi til að skerpa á stefnu flokksins og velja sér nýja forystu. Þar munum við ræða um framtíðina, frelsi einstaklingsins og hvernig við tryggjum sterkt og frjálst samfélag til hagsbóta fyrir alla landsmenn,“ segir í fréttatilkynningu frá Guðrúnu.

Telur rétt að eiga samtal við félaga sína

Fyrir fjórum árum, eftir áratuga starf í atvinnulífinu, hafi hún fundið köllun til að bjóða fram krafta sína í þeirri viðleitni að móta íslenskt samfélag. Sú vegferð hafi verið krefjandi, lærdómsrík og gefandi. Hún hafi notið hverrar stundar og lagt sig fram um að standa vörð um þau grunngildi Sjálfstæðismenn trúa á – frelsi, jafnrétti og rétt einstaklinga til að nýta krafta sína til fulls.

„Á þessum tímamótum í Sjálfstæðisflokknum tel ég rétt að taka samtal við flokksfélaga mína og boða ég til fundar í Salnum í Kópavogi á laugardaginn kemur, 8 febrúar, klukkan 14:00.“

Stefnir í slag um mánaðamót

Fari svo að Guðrún tilkynni um framboð til formanns, sem má svo gott sem fullyrða að hún geri, er ljóst að boðið verður upp á áhugaverðan formannsslag í Laugardalshöll um mánaðamótin komandi. Áslaug Arna Sigurbjörnsdóttir, einnig þingmaður Sjálfstæðisflokksins og fyrrverandi dómsmálaráðherra, tilkynnti um framboð til formanns Sjálfstæðisflokksins á vel sóttum fundi í Sjálfstæðissalnum við Austurvöll fyrir tíu dögum.

Vísir fór á vettvang og rýndi í það hverjir mættu og, það sem meira er, hverjir mættu ekki.

Ýmsir þungavigtarmenn í flokknum hlýddu á Áslaugu Örnu tilkynna framboð sitt og ljóst er að hún nýtur mikils stuðnings í flokknum og meðal þeirra sem haft geta áhrif á kjör um formann.

Áslaug Arna er þó fjarri lagi ein um það að njóta stuðnings í flokknum. Sjálfstæðisfélög í Suðurkjördæmi hafa undanfarið keppst við að lýsa yfir stuðningi sínum við Guðrúnu og hvetja hana til að taka slaginn við Áslaugu. Nú síðast tóku tíu oddvitar á Suðurlandi sig saman og skoruðu á hana að bjóða sig fram til formanns.

Hvor fær atkvæðin sem hefðu verið greidd Guðlaugi Þór?

Þá tilkynnti Guðlaugur Þór Þórðarson, þingmaður Sjálfstæðisflokksins, á mánudag að hann myndi ekki sækjast eftir embætti formanns. Hann gaf kost á sér á síðasta landsfundi gegn Bjarna Benediktssyni, sitjandi formanni, og hlaut fjörutíu prósent greiddra atkvæða. 

Hann hefur um árabil verið vinsæll meðal stórrar fylkingar innan flokksins. Eins og stendur er ómögulegt að segja til um það hvort „Gulla-atkvæðin“ falli með Áslaugu Örnu eða Guðrúnu.

Loks má nefna að fjöllistamaðurinn Snorri Ásmundsson hefur tilkynnt framboð til formanns. Enn er þó óljóst hvort hann eigi sæti víst á landsfundi og þar með óljóst með kjörgengi hans. 

Fréttin hefur verið uppfærð.