Líst illa á að vinna með Sjálfstæðisflokki sem hafi sýnt „hatur og heift“

Eiður Þór Árnason skrifar 8. febrúar 2025 12:45

Kolbrún Áslaug Baldursdóttir fagnar því að Flokkur fólksins eigi loks möguleika á því að komast í meirihluta í borginni. vísir/vilhelm

Fráfarandi oddviti Flokks fólksins í borginni segist fagna því að flokkurinn hafi tækifæri til að komast í meirihluta í borginni en henni sé illa við að vinna með Sjálfstæðisflokknum. Þrátt fyrir langvarandi gott samstarf hafi afstaða hennar breyst eftir að Flokkur fólksins hafi þurft að þola „hatur og heift“ frá Sjálfstæðisflokknum og Morgunblaðinu.

Kolbrún Baldursdóttir hefur beðist tímabundinnar lausnar í borginni og tekið sæti fyrir Flokk fólksins á Alþingi. Helga Þórðardóttir tekur við oddvitasætinu í borginni og segist Kolbrún ekki eiga aðild að yfirstandandi meirihlutaviðræðum. Ekki hefur náðst í Helgu í dag.

Fulltrúar Framsóknarflokks, Sjálfstæðisflokks, Viðreisnar og Flokks fólksins ákváðu í gær að hefja formlegar viðræður um myndun nýs meirihluta eftir að Einar Þorsteinsson, borgarstjóri og oddviti Framsóknar sleit samstarfinu við Samfylkingu, Viðreisn og Pírata.

Þurft að þola ófrægingarherferð

Kolbrún segir í skriflegri yfirlýsingu til fréttastofu að hún hafi átt gott samstarf við fulltrúa Sjálfstæðisflokksins í minnihlutanum í borginni í tæp sjö ár.

„Hins vegar er í mér óhugur að ganga til samstarfs við Sjálfstæðisflokkinn núna þegar við höfum séð það hatur og heift sem Sjálfstæðisflokkurinn, með Morgunblaðið sem vopn hefur beint til Flokks fólksins og forystufólks hans. Annað eins hefur varla sést. Sjálfstæðisflokkurinn er auðvitað sami flokkurinn hvar sem hann er, og það er snúið fyrir flokk eins og Flokk fólksins sem hefur mátt þola ófrægingarherferð Sjálfstæðisflokksins að eiga síðan að vinna náið með honum. En þetta er mín upplifun.“

Þetta hefði hún ekki sagt fyrir fáeinum vikum en nú sé staðan breytt. Þarna eigi hún ekki við um einstaka persónur innan flokksins.

Einar verið sammála fráfarandi meirihluta í flestum málum

Kolbrún telur að sú ákvörðun borgarstjóra að slíta meirihlutasamstarfinu varði engin einstök mál í borginni en gefið hefur verið til kynna að samstarfið hafi endanlega strandað á málefnum Reykjavíkurflugvallar. Kolbrún fullyrðir að Einar hafi í raun verið á sömu nótum og samstarfsflokkarnir í flest öllum málum.

„Hann hefur t.d. ávallt verið sammála þessu fjáraustri til Þjónustu- og nýsköpunarsviðs án þess að sjá verulegan ávinning í samræmi við fjárútlát þess sviðs. Hann virðist hafa lang oftast verið mjög sammála hinum í meirihlutanum,“ segir hún í yfirlýsingu sinni.

Ýmislegt gengur nú á í Ráðhúsi Reykjavíkur.Vísir/Vilhelm

„En þessu sögðu fagna ég vissulega þessu uppbroti í borginni og hvernig sem mál þróast er líklegt að loksins komist Flokkur fólksins í borginni í meirihluta sem er sannarlega tímabært,“ bætir Kolbrún við.

Kolbrún gaf ekki kost á viðtali en aðspurð segir hún það ekki freista sín að snúa aftur í borgina nú þegar Flokkur fólksins hefur loks tækifæri á því taka þátt í meirihlutasamstarfi. Hún sé þvert á móti spennt fyrir komandi störfum á þinginu sem hefjast formlega á þriðjudag.

Fleiri úr flokknum gagnrýnt Morgunblaðið

Auk Kolbrúnar hefur Inga Sæland, formaður Flokks fólksins og Sigurjón Þórðarson, þingmaður hans og formaður atvinnuveganefndar, gert athugasemdir við fréttaflutning um flokkinn. Hafa þau öll sakað Morgunblaðið um að ganga erinda eigenda sinna í þessari umfjöllun og Sigurjón gengið svo langt að kalla eftir því að endurskoða þurfi ríkisstyrki til Morgunblaðsins í kjölfar fréttaflutningsins. Hafa þessi ummæli Sigurjóns víða verið gagnrýnd, meðal annars af Sigríði Dögg Auðunsdóttur, formanni Blaðamannafélags Íslands og Loga Einarssyni, ráðherra fjölmiðla.

Sjá einnig: „Ég lít það alvarlegum augum og ekki heppilegt í þessu samhengi“

Hefur Morgunblaðið og fleiri miðlar meðal annars fjallað um að Flokkur fólksins hafi fengið greidda styrki frá ríkinu þrátt fyrir að hann uppfyllti ekki skilyrði til þess, símtal Ingu við skólastjóra eftir að skópar barnabarns hennar týndist og hagsmunaárekstra Sigurjóns vegna smábátaveiða hans en ríkisstjórnin hyggst auka svigrúm til strandveiða. Þá hefur Morgunblaðið einnig fjallað um fasteignir í eigu Ingu og klæðaburð hennar.

Yfirlýsing Kolbrún Áslaugar Baldursdóttir í heild sinni:

Auðvitað fagnar Flokkur fólksins því að fá tækifæri til að komast í meirihluta og þannig fá meiri möguleika á að koma sínum baráttumálum lengra og spyrna fótum við ýmsu í borginni sem er miður og gengur ekki nógu vel. Mistökin hafa verið mörg síðustu ár og sum algerlega óafturkræfanleg sem er efni í langt mál. Hins vegar er í mér óhugur að ganga til samstarfs við Sjálfstæðisflokkinn núna þegar við höfum séð það hatur og heift sem Sjálfstæðisflokkurinn, með Morgunblaðið sem vopn hefur beint til Flokks fólksins og forystufólks hans. Annað eins hefur varla sést. Sjálfstæðisflokkurinn er auðvitað sami flokkurinn hvar sem hann er, og það er snúið fyrir flokk eins og Flokk fólksins sem hefur mátt þola ófrægingarherferð Sjálfstæðisflokksins að eiga síðan að vinna náið með honum. En þetta er mín upplifun.

Ég hefði ekki sagt þetta fyrir fáeinum vikum því ég hef alltaf átt gott samstarf við Sjálfstæðismenn í borginni í þau tæp 7 ár sem ég var í minnihuta borgarstjórnar. En núna er bara staðan breytt. Hér er ég ekki um að ræða um einstaka persónur svo það sé sagt. Annað sem mér finnst vel líkleg er að Einar hafi fengið skilaboð um að losa sig út úr meirihlutanum og þarf ekki frekar að fara í útskýringar á því. Þetta varðar engin sérstök eða einstök mál í borginni sem þau hafa ekki náð saman um að mínu mati, þvert á móti hefur Einar ávallt verið mjög á sömu nótum og meirihlutinn í eiginlega flest öllum málum. Hann hefur t.d. ávallt verið sammála þessu fjáraustri til Þjónustu- og nýsköpunarsviðs án þess að sjá verulegan ávinning í samræmi við fjárútlát þess sviðs. Hann virðist hafa lang oftast verið mjög sammála hinum í meirihlutanum. En þessu sögðu fagna ég vissulega þessu uppbroti í borginni og hvernig sem mál þróast er líklegt að loksins komist Flokkur fólksins í borginni í meirihluta sem er sannarlega tímabært.

Flokkur fólksins Sjálfstæðisflokkurinn Reykjavík Borgarstjórn

Mest lesið

Fleiri fréttir