Ný ríkis­stjórn sé að efla er­lenda mjólkur­fram­leiðslu

„Enn og aftur eru málefni osta komin til umræðu eftir að Félag Atvinnurekenda, innflytjenda, sendi frá sér hreint ótrúlega fréttatilkynningu fyrr í vikunni,“ skrifar Margrét Ágústa Sigurðardóttir, framkvæmdastjóri Bændasamtakanna í aðsendri grein á Vísi.

Ostamálið svokallaða varðar tollflokkun á innfluttum pitsaosti frá Belgíu. Heildsala hérlendis hóf innflutning á ostinum sem blandaður var við jurtaolíu. Árið 2020 breytti Skatturinn tollflokkun ostsins úr vöru sem ekki þyrfti að greiða tolla af yfir í að bera háa tolla. Vegna þess var Ísland sett á lista yfir viðskiptahindranir af Evrópusambandinu, í fyrsta skipti eftir að belgíski útflytjandinn kvartaði.

Í tilkynningu Félags atvinnurekanda segir að ákvörðun Skattsins hafi verið tekin undir þrýstingi frá fjármálaráðuneytinu, Bændasamtökum Íslands og Mjólkursamsölunni.

Nú hefur Daði Már Kristófersson, fjármála- og efnahagsráðherra, birt í samráðsgátt áform um lagasetningu sem breytir tollflokkuninni svo varan beri ekki tolla.

„Þetta er bein atlaga að innlendri matvælaframleiðslu og landbúnaði á Íslandi,“ skrifar Margrét.

Sjá nánar: „Ísland komið í skammarkrókinn vegna osts“

Hún segir málið einfalt.

„Það mál sem borið hefur hæst í umræðunni snýst um að innflutningsaðili, sem á aðild að Félagi atvinnurekenda, flutti inn mjólkurost frá Belgíu sem jurtaost um langt árabil. Í því máli er staðreyndin einfaldlega sú að eyðing skóga til framleiðslu á pálmaolíu í Asíu gerir belgískan mjólkurost að jurtaosti með því að rúmlega 10% pálmaolíu er bætt við 85% mjólkurost – þetta er sem sagt röksemdin fyrir því að mjólkurostur breytist í jurtaost,“ skrifar Margrét.

Einungis hugað að sérhagsmunum

Málið hafi farið fyrir héraðsdóm og Landsréttur síðan staðfest dóminn. Hæstarétti þótti ekki tilefni til að taka málið á dagskrá.

„Eftir svo afgerandi niðurstöður dómstóla kom það því mjög á óvart að eitt fyrsta mál nýrrar ríkisstjórnar sé að breyta lögum þannig að innfluttur mjólkurostur sem ber tolla verði tollaður líkt og jurtaostur sem ber ekki tolla,“ skrifar Margrét.

Hún segir að þar sé ekki verið að huga að hagsmunum almennings heldur sérhagsmuna þeirra sem flytja vöruna inn. Þessar breytingar gætu haft veruleg áhrif á innlenda mjólkurframleiðslu.

„Fæðuöryggi okkar væri stefnt í hættu ásamt byggðafestu. Störfum á landsbyggðinni myndi fækka, sjálfbærni okkar skert tekjustofnar sveitarfélaga rýrðir og ekki síður myndi samkeppni skekkjast enn frekar. Ég nefni hér sérstaklega samkeppni þar sem tollverndinni er ekki eingöngu ætlað að vernda innlenda matvælaframleiðslu heldur hefur hún ekki síður þann tilgang að rétta við skekkta samkeppnisstöðu er skapast við innflutning,“ skrifar Margrét.