Gras­rót kennara lætur til sín taka á sam­félags­miðlum

„Já, það eru margir að birta sambærilegar færslur. Þetta er sjálfsprottið. Úr grasrót kennara. Ég held að þetta sé upphaflega komið úr Skagafirði en þori ekki að fullyrða þar um,“ segir Jón Hákon í samtali við Vísi.

Mikill fjöldi kennara hefur sett út atvinnuauglýsingu á samfélagsmiðlum:

„Kæri atvinnurekandi, ég leita að nýjum starfsvettvangi.

Ég er háskólamenntaður sérfræðingur með 5 ára starfsreynslu sem kennari.

Helstu styrkleikar og hæfni mín eru:

• Traustur og áreiðanlegur einstaklingur sem tekur ábyrgð á eigin verkefnum.
• Hef góða færni í að leiða hópa og verkefni, hvetja samstarfsfólk og skapa jákvætt vinnuumhverfi.
• Leysi vandamál á skilvirkan hátt.
• Á auðvelt með árangursrík samskipti við ólíka hópa og einstaklinga.
• Á auðvelt með að tileinka mér nýjar aðstæður, tækni eða verklag.
• Reynsla í að stjórna mörgum verkefnum samtímis og tryggja skil á réttum tíma.
• Hæfni til að nýta fjölbreyttar aðferðir við lausn verkefna og laga sig að mismunandi aðstæðum.
• Geta til að meta stöðu, greina gögn og taka upplýstar ákvarðanir.
• Hæfni til að setja skýr markmið og vinna skipulega að því að ná þeim.
• Færni til að vinna með öðrum, deila hugmyndum og byggja upp jákvæða liðsheild. Mikil þolinmæði og samkennd.
• Mikill drifkraftur til að ná árangri. Sýni frumkvæði, sjálfstæði og jákvæðni í starfi.

Forysta KÍ er ekkert eyland

Jón Hákon starfaði áður sem fréttamaður; á Ríkisútvarpinu, Fréttablaðinu og Vísi. Honum vefst tunga um tönn þegar honum er umsvifalaust, í ljósi atvinnuauglýsingar sinnar, boðið starf á Vísi. „Já, það væri … áhugavert.“

En er alvara á bak við atvinnuauglýsinguna?

„Hvað mig sjálfan varðar er þetta fyrst og fremst gjörningur til að vekja athygli á okkar stöðu. En ég veit að aðrir gera þetta að meiri alvöru.“

Jón Hákon segir mælinn vera orðinn fullan býsna víða meðal kennara.

„Við elskum starfið okkar. En við erum orðin langþreytt á þessari kjarabaráttu og finnst við svikin um loforð sem var gefið 2016. 

Við viljum náttúrlega styðja við bakið á forystu KÍ. Það er stundum látið eins og þau séu eyland í þessari baráttu en forystan er með kennarastéttina á bak við sig. Það er þess vegna sem við gerum þetta og mætum hundruðum saman á Austurvöll þegar Kristrún flytur stefnuræðu, bæði til að minna á það að kjör kennara eru það lök að kennarar eru að flýja stéttina en líka til að minna á stöðu skólanna.“

Segir annarra að hafa áhyggjur af verðbólgu

Jón Hákon telur kennara njóta víðtæks stuðnings.

„Já, mér heyrist það. Það var mjög jákvætt og gott að heyra hljóðið í foreldrum í kvöldfréttum á föstudaginn. Mér sýnist við heilt yfir eiga stuðning foreldra vísan.“

En þetta eru býsna harðar kröfur, ef svo væri ekki þá væri búið að ná saman fyrir löngu?

„Ég veit það nú ekki. Krafan er fyrst og fremst sú að staðið verði við gefin loforð og það er engin harka að staðið verði við gefin loforð. Það er sanngirniskrafa.“

En höfum við efni á þessu? Eða, þýðir þetta þá ekki einfaldlega að ef orðið verður að kröfum kennara þá tekst ekki að ná neinum tökum á verðbólgunni?

„Það er annarra að fást við það. Við getum ekki ein tekið ábyrgð á henni.

Kennarar hafa svarað kallinu og á samfélagsmiðlum má sjá ótal umsóknir af því sama tagi og Jón Hákon setti í loftið:

Þessar auglýsingar skipta hundruðum...