Bandarískir fjölmiðlar greina frá þessu og vísa í orð lögreglustjórans Adan Mendoza. Hundur hjónanna á einnig að hafa fundist dauður.
Gene Hackman var 95 ára en Arakawa 63 ára, en þau gengu í hjónaband árið 1991. Mendoza segir að ekki liggi fyrir um hvað hafi dregið hjónin til dauða, en að ekki sé grunur um glæpsamlegt athæfi.
Hackman er meðal annars þekktur fyrir hlutverk sitt sem Jimmy „Popeye“ Doyle í myndinni The French Connection 1971. Þá fór hann með stórt hlutverk í myndinni Unforgiven auk þess að túlka illmennið Lex Luthor í Superman-myndunum á áttunda og níunda áratugnum.
Hackman vann á ferli sínum til tvennra Óskarsverðlauna, fyrir aðalhlutverk í French Connection og svo aukahlutverk fyrir Unforgiven. Þá vann hann til fernra Golden Globe-verðlauna á ferli sínum.
Hackman lék á ferli sínum í rúmlega hundrað kvikmyndum, en hann hætti störfum sem leikari árið 2004. Í seinni tíð ritaði Hackman fjölda bóka, meðal annars nokkurn fjölda sögulegra skáldsagna.
Meðal annarra mynda sem Hackman lék í voru Bonnie and Clyde (1967) The Poseidon Adventure (1972), Scarecrow (1973), The Conversation (1974), A Bridge Too Far (1977), Under Fire (1983), Power (1986), Mississippi Burning (1988), Loose Cannons (1990), The Firm (1993), The Quick and the Dead (1995), The Birdcage (1996), Enemy of the State (1998), Behind Enemy Lines (2001), The Royal Tenenbaums (2001) og Runaway Jury (2003).
Hann var giftur Faye Maltese á árunum 1956 til 1986 og áttu þau saman þrjú börn.
