Orri leið­togi nýrrar gullkynslóðar

Fyrsti leikurinn undir stjórn Arnars verður í Pristina 20. mars næst komandi og sá síðari, sem telst sem heimaleikur Íslands, fer fram í Murcia á Spáni þremur dögum síðar. Liðið sem vinnur einvígið verður í B-deild Þjóðadeildarinnar en tapliðið fer í C-deild.

Arnar tók við í janúar og hefur legið yfir valinu síðan.

„Þetta var erfitt og mikil áskorun en að lokum er ég mjög sáttur við mitt val og þá möguleika sem við höfum innan þessa hóps. Þetta er erfitt. Við erum með mikið magn leikmanna, eiginlega meira en maður heldur. Sem er jákvætt. Auðvitað er leiðinlegt að menn séu ekki valdir, það langar alla að vera með í þessu verkefni, en því miður er bara hægt að velja 23. Svona lítur hópurinn út núna og svo sjáum við til næst,“ segir Arnar um valið.

Orri og Hákon leiðtogar til framtíðar

Arnar tilkynnti jafnframt um nýjan landsliðsfyrirliða. Aron Einar Gunnarsson hefur verið fyrirliði frá árinu 2012 en Jóhann Berg Guðmundsson borið bandið undanfarin misseri þar sem Aron hefur verið töluvert frá vegna meiðsla.

Fyrirliðatíð Arons er aftur á móti lokið. Orri Steinn Óskarsson er nýr landsliðsfyrirliði, aðeins tvítugur, og er hann sá yngsti í sögunni til að bera bandið.

Aðspurður um hvaða eiginleikar Orra kalli á það að hann sé nýr fyrirliði segir Arnar:

„Ég hafði einhverja sterka skoðun á því fyrir nokkrum mánuðum síðan að næsti fyrirliði myndi koma frá þessari kynslóð, nýju gullkynslóðinni. Að þeir myndu fá rödd. Mér finnst þeir vera tilbúnir, þeir eru komnir á ansi hátt stig með sínum félagsliðum,“

„Orri er þroskaður einstaklingur sem kemur vel fyrir í fjölmiðlum. Hann er á frábærum stað í Sociedad og þeir meta hann mikils. Ég fór og heimsótti hann, fékk að vera með honum í þrjá daga, og fékk að kynnast honum betur. Þá varð ég enn sannfærðari um að valið sé rétt,“

„Hákon (Arnar Haraldsson) er varafyrirliði. Þetta eru ólíkar týpur en báðir eiga sameiginlegt að þeir eru miklir leiðtogar inni á velli. Þeir þurfa að læra á nýtt hlutverk, að sjálfsögðu. En það er mín sýn að þetta færi þeirra leik upp á nýtt stig, að fá þessa ábyrgð. Ég vonast til að þeir fái góðan stuðning frá eldri leikmönnum og frá þjóðinni,“ segir Arnar.

Aron Einar veiti jafnvægi

Arnar ákvað hins vegar að velja Aron Einar í hópinn. Vera hans þar sé mikilvæg.

„Ég held að þetta snúist um að hann sé fit. Hann hefur náð góðri æfingatörn síðustu mánuði og spilað fáa, en erfiða leiki í Meistaradeild Asíu. Ég hef spjallað við hann reglulega og hann er mjög spenntur og hungraður. Mér fannst mikilvægt að hafa sterka viðveru frá þessari kynslóð í þessum hópi. Þú vilt hafa gott jafnvægi í hvaða hópi sem er. Mér finnst þessi hópur hafa gott jafnvægi í aldri og hæfileikum,“ segir Arnar.

Gylfi ekki á réttum stað

Gylfi Þór Sigurðsson er ekki í hópnum þar sem hann er að komast af stað eftir meiðsli og Jóhann Berg Guðmundsson er meiddur og verður ekki með. Arnar útilokar ekki að Gylfi Þór fái sæti í hópnum eftir að tímabilið er komið af stað hér heima.

„Mér finnst þetta ekki rétti tímapunkturinn að velja leikmenn sem eru á Íslandi í mars-mánuði. Þetta er búinn að vera djöfullegur vetur og skrýtinn að mörgu leyti. Ég veit að leikmenn eru ósammála og þeir segjast allir vera í toppstandi og klárir, sem er bara frábært. En það er mín skoðun sem gildir og í þetta skipti verðum við að gefa honum betri tíma til að komast í betra stand með sínu félagsliði. Vonandi verður hann í toppstandi þegar næsti hópur er valinn,“

Hitti Arnór í Liverpool

Arnór Sigurðsson er ekki heldur í hópnum. Þeir Arnar hafa verið í samskiptum en Arnór samdi nýverið við Malmö í Svíþjóð. Hann er að komast af stað eftir meiðsli.

„Við hittumst í Liverpool þegar við sáum saman Hákon spila við Liverpool. Hann er komiinn í frábært félag, Malmö, sem ég þekki nokkuð vel. Hann er bara nýbyrjaður að æfa aftur og er klárlega einhver sem við fylgjumst með í framtíðinni,“ segir Arnar.

Ný gullkynslóð

Arnar ítrekar þá að ný gullkynslóð sé komin í landsliðið. Hana leiði nýju fyrirliðarnir, Orri Steinn og Hákon Arnar.

„Ég er alveg sannfærður um það. Ég held ég sé ekkert að setja auka pressu á þá með því að segja það. Þeir hafa sannað það síðustu ár og mánuði á stærsta sviði sem til er, á erfiðum útivöllum. Þeir eru tilbúnir í slaginn,“ segir Arnar.

Fleira kemur fram í viðtalinu sem má sjá í heild í spilaranum að ofan.