Frá þessu var greint í dag, í aðdraganda þess að Álftanes mætir Njarðvík í IceMar-höllinni þar sem Álftnesingar geta með sigri sópað Njarðvíkingum út í sumarfrí og komið sér í undanúrslit Bónus-deildarinnar.
Haukur, sem verður 33 ára í næsta mánuði, kom til Álftaness fyrir síðustu leiktíð og hefur því verið einn af leiðtogum liðsins fyrstu tvö ár í sögu þess í efstu deild.
Þessi þrautreyndi landsliðsmaður og fyrrverandi atvinnumaður hefur samkvæmt tilkynningu Álftnesinga ekki aðeins skilað miklu inni á vellinum heldur einnig utan hans og fyrir félagið í heild.
„Haukur Helgi er frábær leiðtogi á vellinum og fyrir okkur sem stöndum að klúbbnum á Álftanesi er það afar ánægjulegt að hann spili áfram fyrir okkur. Ekki bara er það vegna stórkostlegra hæfileika hans inn á vellinum heldur líka þátttaka hans í að byggja upp þennan unga klúbb,“ segir Huginn Freyr Þorsteinsson, formaður körfuknattleiksdeildar Álftaness.
Sjálfur er Haukur hæstánægður með sína ákvörðun: „Ég er hrikalega sáttur með þessa framlengingu og að ég geti haldið áfram að spila fyrir þennan frábæra klúbb sem og fengið að taka þátt í uppbyggingu félagsins.“
