Innlent

Vestfjarðaleiðin verði Hring­vegur númer tvö

Kristján Már Unnarsson skrifar
Nýi vegurinn yfir Dynjandisheiði. Horft niður í Geirþjófsfjörð og Arnarfjörð. Fyrir miðri mynd er nýr áningarstaður með þessu magnaða útsýni.
Nýi vegurinn yfir Dynjandisheiði. Horft niður í Geirþjófsfjörð og Arnarfjörð. Fyrir miðri mynd er nýr áningarstaður með þessu magnaða útsýni. Vegagerðin/Haukur Sigurðsson

Eyjólfur Ármannsson innviðaráðherra hefur ákveðið að skipa starfshóp undir forystu Vegagerðarinnar til að kanna kosti þess og galla að skilgreina vegina sem mynda hringleið um Vestfirði sem hringveg sem fengi vegnúmerið 2. Þetta er í samræmi við tillögu nefndar forsætisráðherra um eflingu byggðar á Ströndum.

Katrín Jakobsdóttir, þáverandi forsætisráðherra, skipaði nefnd um málefni Stranda í janúar 2024 og voru tillögurnar birtar á vef Stjórnarráðsins síðastliðinn miðvikudag. Nefndin, undir formennsku Áslaugar Maríu Friðriksdóttur, var skipuð fulltrúum forsætisráðuneytis, innviðaráðuneytis, Byggðastofnunar, Fjórðungssambands Vestfirðinga, Árneshrepps, Kaldrananeshrepps og Strandabyggðar.

Tillagan um Hringveg 2, hringveg um Vestfirði, er ein af fjórum megintillögum nefndarinnar. Markmiðin með aðgerðinni eru sögð að skapa tækifæri fyrir atvinnulíf, meðal annars ferðaþjónustu, og íbúa á Vestfjörðum og að bæta vetrarþjónustu og viðhald vega.

Frá nýju brúnni yfir Þorskafjörð.Egill Aðalsteinsson

Lagt er til að vegir með vegnúmerin 60, 61, 62, 63 og 68 fái vegnúmerið 2. Vegur 60, núverandi Vestfjarðavegur, liggur milli Hringvegarins númer eitt í Norðurárdal í Borgarfirði og Skutulsfjarðar. Vegur 61 liggur milli Reykhólasveitar og Bolungarvíkur, yfir Þröskulda, um Hólmavík, Steingrímsfjarðarheiði og Ísafjarðardjúp. Vegur 62 liggur milli Flókalundar og Patreksfjarðar. Vegur 63 liggur milli Patreksfjarðar og Dynjandisheiðar um Tálknafjörð og Bíldudal. Vegur 68 liggur milli Staðarskála í Hrútafirði og Steingrímsfjarðar.

„Vegurinn fengi þar með aukið vægi þegar kemur að vetrarþjónustu og viðhaldi vega sem er mikilvægt fyrir íbúa og atvinnustarfsemi á svæðinu, ekki síst útflutningsgreinar og ferðaþjónustu,“ segir í áliti nefndarinnar.

Þátturinn Um land allt, sem frumsýndur var í marsmánuði 2021, fjallaði um þennan nýja hringveg, Vestfjarðaleiðina. Hér má sjá sjö mínútna kafla úr þættinum:

Hugmyndin um Hringveg 2 um Vestfirði er ekki ný af nálinni. Þannig tók Jón Gunnarsson, þáverandi samgönguráðherra, vel í hana í viðtali við Viðskiptablaðið árið 2017.

Áskrifendur Stöðvar 2 og Stöðvar 2+ geta séð þættina Um land allt í streymisveitu Stöðvar 2 hvar og hvenær sem er.

Hér er kynningarstikla þáttarins um Vestfjarðarleiðina:

Strandabyggð Vegagerð Samgöngur Ferðaþjónusta Ferðalög Ísafjarðarbær Vesturbyggð Bolungarvík Súðavíkurhreppur Reykhólahreppur Húnaþing vestra Árneshreppur Kaldrananeshreppur Byggðamál

Tengdar fréttir

Vestfirðingar þokast nær langþráðum vegabótum

Borgarverk í Borgarnesi átti lægsta tilboð í næsta áfanga Vestfjarðavegar um Dynjandisheiði og reyndist tilboð verktakans 280 milljónum króna undir kostnaðaráætlun. Vegagerðin snertir helsta náttúrudjásn Vestfjarða, fossinn Dynjanda.

Keppast við vegabætur áður en holskefla ferðamanna ríður yfir

Vestfirðingar gleðjast yfir því í dag að ferðabókaútgefandinn Lonely Planet hafi sett fjórðunginn í efsta sæti yfir þau svæði heims sem best sé að heimsækja á næsta ári. Ferðamanna bíða hins vegar holóttir malarvegir og einbreiðar brýr fyrir vestan og það stefnir í bið eftir næsta áfanga á Dynjandisheiði.

Vestfirðingar vonast til að hylli undir lok sögunnar endalausu

„Við höfum náttúrlega reynslu af því að þurfa að bíða mjög lengi eftir því að fá samgöngubætur, eins og Teigsskógarruglið hefur verið. Við bara þekkjum það vel. Og það er ekkert í höfn fyrr en við bara sitjum í bílunum okkar og það er verið að opna vegina okkar,“ segir Hafdís Gunnarsdóttir, formaður Fjórðungssambands Vestfirðinga.

Mest lesið


Fleiri fréttir

Sjá meira


×

Mest lesið