Ætlar að ein­beita sér að Tesla eftir slæmt upp­gjör

Hagnaður Tesla á fyrsta ársfjórðungi þessa árs dróst saman um 71 prósent, borið saman við sama ársfjórðung í fyrra. Hagnaður á hvern hlut er 27 sent, en greinendur höfðu búist við 41 senti á hlut, samkvæmt frétt Wall Street Journal.

Tesla hagnaðist um tæplega 410 milljónir dala á ársfjórðungnum, sem samsvarar um 51,2 milljörðum króna. Á sama fjórðungi í fyrra var hagnaðurinn hins vegar 1,4 milljarðar dala eða um 176 milljarðar króna.

Mikill samdráttur varð á tekjum fyrirtækisins í bílasölu. Hann var tæpir fjórtán milljarðar á fyrsta fjórðungi þessa árs en á sama tíma í fyrra var hann 17,4 milljarðar dala og samsvarar það um tuttugu prósenta samdrætti.

Tekjur fyrirtækisins á sviði raforku og rafhlaðna jukust hins vegar um 67 prósent og voru 2,7 milljarðar dala.

Áhugasamir geta fundið frekari upplýsingar um uppgjör Tesla hér.

Kenna tollum og pólitísku andrúmslofti um

Forsvarsmenn Tesla segja markaðsumhverfið slæmt og vísa meðal annars til tolla Trumps, sem valdið hefur álagi á birgðakeðjum og aukið kostnað verulega. Einnig segir í samantekt Tesla á uppgjörinu að pólitískt andrúmsloft hafi mikil áhrif haft á reksturinn og þau áhrif gætu varið áfram og dregið úr eftirspurn eftir bílum fyrirtækisins.

Sjá einnig: Trump segir skemmdar­verk á Teslum hryðju­verk

Virði hlutabréfa Tesla hefur minnkað um rúm fjörutíu prósent það sem af er ári.

Á fundi með hluthöfum sem haldinn var eftir að uppgjörið var birt lýsti Musk því yfir að hann ætlaði að einbeita sér að rekstri Tesla í næsta mánuði. Hann muni verja mun minni tíma í störf stofnunarinnar DOGE sem staðið hefur fyrir umfangsmiklum og umdeildum niðurskurði í Bandaríkjunum undanfarna mánuði.

Musk sagðist þó ætla að halda áfram að styðja Trump með DOGE og tryggja að meint sóun og spilling sem stofnunin hefur barist gegn stingi ekki aftur upp kollinum.

Hann varði nærri því þrjú hundruð milljónum dala í að hjálpa Trump að ná kjöri og hefur tekið virkan þátt í starfi ríkisstjórnar hans.

Sjá einnig: Trump dregur úr völdum Musk eftir hitafund

Þessu starfi og ýmsum yfirlýsingum Musks hafa fylgt mikil mótmæli í Bandaríkjunum og Evrópu. Á áðurnefndum fundi með fjárfestum hélt Musk því fram, samkvæmt frétt CNBC, að mótmælin væru mjög skipulögð og sagði enn fremur líklegt að mótmælendur væru að fá greitt fyrir mótmælin úr opinberum sjóðum gegnum einhverskonar spillingu.

Sjá einnig: Erjur í innsta hring Trump fyrir opnum tjöldum

Áður en hann talaði um tolla Trumps andvarpaði Musks hátt og sagðist svo hafa barist fyrir lægri tollum. Hann sagðist ætla að gera það áfram en sagði ákvörðunina alfarið í höndum Trumps.

„Hann ræður því svo hvort hann hlustar á ráðleggingar mínar.“