Elti ástina til Ís­lands

Margt svipað með Reykjavík og New York

Snny er fæddur á Fílabeinsströndinni í Vestur-Afríku og alinn upp í Boston. Hann kynntist eiginkonu sinni fyrirsætunni Sigrúnu Evu Jónsdóttur-Bouraima í New York og ástin leiddi hann svo til Íslands, þar sem hann unir sér vel.

„Það hefur verið gefandi bæði að búa og skapa í Reykjavík. Mér finnst skapandi samfélagið hér þrífast vel og ég er með stúdíó í Hafnar.hausi sem er skapandi rými í Hafnarhúsinu þannig mér finnst ég ná að vera svolítið í hringiðunni á þessu öllu. Þó að þetta sé frábrugðið New York að mörgu leyti finnst mér orkan í listasenunni í raun mjög svipuð.“

Sonny og Sigrún eiga saman dóttur en hún fæddist á Íslandi árið 2019 rétt áður en Covid faraldurinn hófst.

„Við fluttum svo til Íslands í Covid. Dóttir okkar fæddist hér í október 2019 og við ætluðum svo að flytja aftur til New York í febrúar 2020. Mánuði seinna skall Covid á þannig við komum aftur hingað og settumst að í Reykjavík.“

Heillaðist að japönskum jazz kaffihúsum

Við gerð EP plötunnar caféradio var gleðin í fyrirrúmi.

„Öll þessi lög á plötunni voru samin í stúdíóinu þar sem við vorum bara að skemmta okkur vel og vorum ekki að hugsa um neitt annað en njóta þess að skapa fyrir sköpunina. Ég fór í gegnum ákveðna enduruppgötvun á mínu sköpunarferli.

Í ferlinu heillaðist ég mjög að svokölluðum japönskum jazz kissa, sem eru kaffihús með alvöru gæða hljóðkerfi og gríðarlegu plötusafni. Ég togaðist í átt að þessu og sá fyrir mér hvers lags tónlist ég myndi vilja heyra á slíku kaffihúsi.“

Hér má hlusta á plötuna á streymisveitunni Spotify: 

Hann sótti sömuleiðis mikinn innblástur í ekta Tókýó stíl, þar á meðal ljósmyndir Kyoichi Tsuzuki af pínulitlum og fallegum íbúðum í stórborginni.

„Ljósmyndirnar hans grípa eitthvað sem ég hef alltaf heillast að. Hið ljóðræna ójafnvægi, sálin í ófullkomnuninni og hvernig rými getur sagt sögu án þess að segja orð. Ég ákvað að prófa að senda á Kyoichi en bjóst ekki við því að fá einhver svör. 

En ótrúlegt en satt tók hann ótrúlega vel í hugmyndina og við unnum saman plötuumslagið fyrir caféradio. Það endurspeglar nándina og hlýjuna sem ég vil að einkenni tónlistina mína.“

Upplifun í einangrun

Platan hefur verið í vinnslu hjá Snny í rúmt ár.

„Ég var ekki með ákveðinn skilafrest á þessu, mig langaði bara að leyfa tónlistinni að þróast náttúrulega og njóta alls ferlisins.“

Hér má sjá tónlistarmyndbandið við lagið Vanguard af plötunni:

Hugmyndin að tónlistarmyndbandinu kom í kjölfar þess að danska hljóðfyrirtækið AIAIAI valdi Snny í hóp þeirra listamanna sem þau styrkja.

„Þau sendu mér þráðlausa mónitora til að búa til eitthvað skemmtilegt efni í kringum. Hugmyndin var að skapa einstaklingsbundna hlustunar-upplifun sem fer fram í einangrun, úti í náttúrunni með engar truflanir. Bara hljóð, rými og snjór.“