Fram kom í dagbók lögreglunnar í morgun að tilkynnt hefði verið um líkamsárás á svæði lögreglustöðvar 3 sem sinnir verkefnum í Kópavogi og Breiðholti.
Sigrún Kristín Jónasdóttir lögreglufulltrúi segir árásina við Breiðholtsskóla hafa átt sér stað um fimmleytið síðdegis í gær. Þar hafi fólk á þrítugsaldri verið á göngu þegar nokkrir aðilar hafi stigið út úr bíl og farið að áreita það.
Fólkið hafi ekki orðið fyrir alvarlegum meiðslum. Enn er á huldu hverjir gerendurnir eru en vonast er til að upptökur úr eftirlitsmyndavélum geti hjálpað til við að leiða í ljós hverjir voru þarna að verki.