Luigi Mangione var handtekinn í desember í fyrra grunaður um að hafa skotið Brian Thompson, forstjóri UnitedHealthcare, til bana fyrir utan skrifstofur fyrirtækisins. Hann á svo að hafa flúið vettvang á hjóli í Central Park. Hann fannst fimm dögum síðar á veitingastað McDonald's í Pennsylvaníuríki. Hann hefur meðal annarra liða verið ákærður fyrir hryðjuverk.
Mangione er ekki nema 26 ára gamall og saga hans vakti mikla athygli víða um heim. Hann er af mörgum talinn eins konar píslarvottur sem fékk upp í kok af brestum og misferlum hins bandaríska einkarekna heilsutryggingageira.
Deilir fangelsi við Diddy og Bankman-Fried
Nú fá Kaliforníubúar að sjá sögu hans á fjölunum en föstudaginn 13. júní mun Taylor Street-leikhúsið í San Francisco setja upp sýninguna Luigi: The Musical, eða Söngleikinn Luigi. Undirtitill sýningarinnar er: „Saga um ást, morð og hash brown,“ en hash brown er eins konar steikt kartöflustykki sem er vinsælt meðlæti víða í Bandaríkjunum.
Sjá einnig: Fara fram á að Mangione fái dauðarefsinguna
Komið hefur fram í fjölmiðlum vestanhafs að Mangione sætir gæsluvarðhaldi í sama fangelsi og tónlistarmaðurinn og meinti níðingurinn Sean „Diddy“ Combs og „rafmyntakóngurinn“ Sam Bankman-Fried sem var á síðasta ári dæmdur í 25 ára fangelsi fyrir umfangsmikil fjársvik í tengslum við rafmyntafyrirtækið FTX sem hann stofnaði. Mennirnir þrír deila ekki klefa í alvörunni og eru ólíklega í miklum eða nokkrum samskiptum í alvörunni en það gera þeir í Söngleiknum Luigi.
„Söngleikurinn Luigi er grínleikur þar sem settar eru á svið þær súrrealísku aðstæður að Luigi Mangione, maðurinn sem er grunaður um að hafa orðið Brian Thompson forstjóra UnitedHealthcare að bana, deili fangelsi með Sam Bankman-Fried og Sean „Diddy“ Combs. Þó að hugmyndin sé fáránleg byggir hún á undarlegri staðreynd: þessir þrír menn voru í raun fangelsaðir á sama stað. Þessi ólíklega staðreynd var kveikjan að sköpuninni hjá teyminu okkar,“ segir í kynningarefni sýningarinnar.
Fáránlegur fangaklefi
Á heimasíðunni er einnig nóg af varnöglum og fyrirvörum um að aðstandendurnir vilji alls ekki gera lítið úr glæpum þessara manna né heldur sé sýningin hvatning af neinu tagi. Sýningin gagnrýni í raun þessa menn og þau kerfi sem hafa mótað þá.
„Persónurnar okkar endurspegla þrjá burðarása vonleysis nútímans: heilbrigðiskerfið, tæknigeirann og Hollywood. Hver þeirra er persónugerving hornsteins bandarísks samfélags rúins trausts og þar sem sífellt fleiri upplifa sig svikin, hlunnfarin eða yfirgefin. Með því að sameina þessa krafta í einn fáránlegan fangaklefa rekum við spegil framan í samtímann: ögrandi, súrrealískt og fyndið en tilfinningalega heiðarlegt,“ segir í kynningarefni sýningarinnar.
