Krókódíllinn úr Happy Gilmore allur

Langur og farsæll kvikmyndaferill krókódílsins hófst árið 1975, eftir að honum hafði verið bjargað úr ólöglegu gæludýrahaldi í Los Angeles. Auk frammistöðunnar í Happy Gilmore kom Morris fyrir í kvikmyndum á borð við Interview with the Vampire, Dr Dolittle 2, og Blues Brothers 2000.

Hann settist í helgan stein frá kvikmyndagerð árið 2006 og dvaldi á sérstöku verndarsvæði krókódíla í Colorado síðustu árin.

Nákvæmur aldur Morris lá ekki fyrir, en samkvæmt aldursgreiningu, sem byggði á rannsóknum á tönnum og skinni var hann um það bil áttatíu ára gamall.

Tekin hefur verið ákvörðun um að Morris verði uppstoppaður.

Kvikmyndastjarnan Adam Sandler, sem fór með hlutverk titilpersónunnar í Happy Gilmore, skrifaði minningargrein um krókódílinn á samfélagsmiðla.

„Vertu sæll, Morris. Við munum öll sakna þín. Þú gast verið erfiður í samskiptum við leikstjóra, förðunarfólk, búningaliðið – og í raun alla með útlimi – en ég veit að þú gerðir það með hag kvikmyndarinnar í huga. Daginn sem þú neitaðir að koma úr vagninum þínum nema við myndum gefa þér fjörutíu kálhausa kenndir þú mér mikilvæga lexíu: Aldrei gefa eftir í listsköpun þinni,“ segir í minningargrein Sandlers.

Framhaldsmynd, sem mun bera heitið Happy Gilmore 2, er væntanleg í næstkomandi júlí.