Fótbolti

Beever-Jones með þrennu í fyrsta lands­leiknum sínum á Wembley

Óskar Ófeigur Jónsson skrifar
Agnes Beever-Jones fagnar einu þriggja marka sinna á Wembley í kvöld.
Agnes Beever-Jones fagnar einu þriggja marka sinna á Wembley í kvöld. Getty/Mike Hewitt

Agnes Beever-Jones og félagar hennar í enska landsliðinu voru í miklu stuði á Wembley leikvanginum í Þjóðadeild kvenna í fótbolta í kvöld.

England vann 6-0 sigur á Portúgal en enska liðið hafði tapað óvænt fyrir Elísabetu Gunnarsdóttur og stelpunum hennar í belgíska landsliðinu í leiknum á undan.

Hin 21 árs gamla Beever-Jones, sem spilar með Chelsea, var að spila fyrsta landsleik sinn á Wembley og hún var komin með þrennu eftir aðeins 33 mínútur.

Beever-Jones skoraði fyrsta mark sitt á þriðju mínútu og tveimur mínútum síðar kom Lucy Bronze enska liðinu í 2-0.

Beever-Jones skoraði annað mark sitt á 26. mínútu og kórónaði þrennuna sína á 33. mínútu. Fjórum mínútum fyrr hafði Beth Mead komið enska liðinu í 4-0.

Varamaðurinn Chloe Kelly skoraði síðan sjötta mark enska liðsins á 62. mínútu.

Enska liðið er í öðru sæti riðilsins, tveimur stigum á eftir toppliði Spánar, en báðar þjóðir hafa tryggt sér áframhaldandi veru í A-deildinni.

Frakkar eru með yfirburðastöðu í íslenska riðlinum eftir fimm sigra í fimm leikjum en frönsku stelpurnar unnu 4-0 stórsigur á Sviss í kvöld. Frakkar spila lokaleik sinn í riðlinum á Laugardalsvelli.

Clara Mateo, Élisa de Almeida og Sandy Baltimore komu Frökkum í 3-0 á fyrstu tuttugu mínútunum en þannig var staðan í hálfleik. Grace Geyoro skoraði fjórða markið á 56. mínútu.




Fleiri fréttir

Sjá meira


×