Handbolti

Magdeburg upp í topp­sætið en Melsungen mis­steig sig

Óskar Ófeigur Jónsson skrifar
Ómar Ingi Magnússon og félaga í Magdeburg kláruðu sitt í kvöld og settu pressuna á Füchse Berlin.
Ómar Ingi Magnússon og félaga í Magdeburg kláruðu sitt í kvöld og settu pressuna á Füchse Berlin. Getty/Hendrik Schmidt

Íslendingaliðið Magdeburg komst í kvöld upp í toppsæti þýsku deildarinnar eftir öruggan átta marka heimasigur i næstsíðustu umferð deildarkeppninnar.

Magdeburg vann 35-27 sigur á Flensburg-Handewitt eftir að hafa verið 17-12 yfir í hálfleik.

Ómar Ingi Magnússon var með fjögur mörk og tvær stoðsendingar en Gísli Þorgeir Kristjánsson gat ekki spilað vegna axlarmeiðsla sinna á dögunum. Philipp Weber var markahæstur með sjö mörk og Tim Hornke skoraði sex mörk.

Sigurinn skilar Magdeburg upp í 55 stig og einu stigi upp fyrir Füchse Berlin. Berlínarliðið á þó leik inni og gæti því endurheimt toppsætið fyrir lokaumferðina. Það stefnir hins vegar í æsispennandi lokaumferð um næstu helgi.

Þetta var þrettándi deildarsigur Magdeburg í röð en liðið hefur unnið alla deildarleiki sína frá 21. mars.

Annað Íslendingalið missteig sig í toppbaráttunni því Melsungen gerði 26-26 jafntefli á heimavelli á móti Lemgo. Melsungen er því bara með 53 stig fyrir lokaumferðina.

Elvar Örn Jónsson var með fjögur mörk og fjórar stoðsendingar í leiknum en Arnar Freyr Arnarsson komst ekki á blað.




Fleiri fréttir

Sjá meira


×