Var fluttur ó­vart úr landi en er snúinn aftur

Kilmar Abrego Garcia var í hópi manna sem fluttur var í alræmt fangelsi í El Salvador um miðjan marsmánuð en viðurkenndu embættismenn að hafa sent hann fyrir mistök. Eftir að málið vakti athygli var hann færður í annað fangelsi.

Garcia er upprunalega frá El Salvador og flutti ólöglega til Bandaríkjanna árið 2012. Árið 2019 var hann handtekinn og sakaður um glæpastarfsemi en hlaut ekki dóm í málinu. Hins vegar úrskurðaði dómari að hann gæti ekki snúið aftur til El Salvador þar sem honum átti að stafa ógn af glæpagengjum þar. 

Hann var þá handtekinn aftur í mars síðastliðnum og sakaður um að vera meðlimur alræmda gengisins MS-13. Eins og áður kom fram var hann þá fluttur í fangelsi í El Salvador.

Verði sendur aftur til El Salvador

Á blaðamannafundi fyrr í dag sagði Pam Bondi, ríkissaksóknari Bandaríkjanna, að Garcia væri kominn aftur til Bandaríkjanna. Forsvarsmenn Bandaríkjanna hefðu samið við forsvarsmenn El Salvador um að sleppa honum þar sem að Bandaríkin hefðu gefið út handtökuskipun á hendur Garcia.

„Kilmar Abrego Garcia hefur lent í Bandaríkjunum til að horfast í augu við réttlætið,“ sagði Bondi.

„Þann 21. maí skilaði stórdómsnefnd í Tennesse innsigluðum ákærulið gegn Abrego Garcia fyrir smygl á útlendingum og samsæri um smygl á útlendingum.“

Í ákærunni, sem áhugasamir geta lesið hér, segir að Garcia og hópur einstaklinga hafi flutt inn þúsundir ólöglegra innflytjenda til landsins gegn gjaldi. Einhverjir af þessum þúsundum manna eiga að hafa verið meðlimir MS-13 gengisins.

Þá sagði Bondi að þegar Garcia hefur lokið afplánun í Bandaríkjunum verði hann aftur sendur til El Salvador.