Innlent

Klara Baldurs­dóttir er látin

Silja Rún Sigurbjörnsdóttir skrifar
Klara Baldursdóttir rak lengi bar á Kanarí sem var alltaf kallaður Klörubar.
Klara Baldursdóttir rak lengi bar á Kanarí sem var alltaf kallaður Klörubar.

Klara Baldursdóttir, betur þekkt sem Klara á Klörubar, er látin. Hún var 74 ára að aldri. Hún lætur eftir sig tvo syni.

Klara fæddist þann 22. janúar 1951, næstyngst af fimm börnum hjónanna Baldurs Jónssonar kaupmanns og Hansínu Helgadóttur. Hún bjó lengst af á höfuðborgarsvæðinu sem barn en bjó einnig í tvö ár á Spáni.

Klara flutti til Spánar sumarið 1969 og aftur 1970 til lengri tíma. Hún kynntist Francisco Casadeus eiginmanni sínum árið 1971. Nokkrum árum síðar fluttu þau hjónin til Kanarí þar sem þau opnuðu barinn Cosmos en var hann ætíð kallaður Klörubar. Þau eignuðust saman tvo syni, Eirík og Jordans. Francisco lést árið 2021.

Í ítarlegu viðtali Rakelar Sveinsdóttur við Klöru sem tekið var árið 2024 kemur fram að Klara var sögð eins konar umboðsmaður eða ræðismaður fyrir Íslendinga á Kanarí. Árið 2007 tók hún svo við embætti ræðismanns á Kanarí.

Jordi Hans greinir frá andláti Klöru í færslu í Facebook-hóp Kanaríflakkara.

„Með djúpri sorg tilkynnum við að elskuleg vinkona okkar og dásamleg kona, Klara Baldursdóttir, er fallin frá,“ skrifar Jordi Hans.

Kveðjustund verður haldin á laugardag á Kanarí til að heiðra minningu Klöru. 




Fleiri fréttir

Sjá meira


×