Taiwo Badmus stað­festur hjá Stólunum: „Ég er kominn heim“

Badmus hefur spilað með Valsmönnum síðustu tvö tímabil en hann varð Íslandsmeistari með Tindastól 2023 og varð síðan meistari með Val árið eftir.

Badmus átti mjög gott tímabil með Val síðasta vetur en hann var með 23,4 stig og 7,2 fráköst að meðaltali í leik. Hann var án vafa einn af bestu leikmönnum deildarinnar og þetta er því góður liðstyrkur fyrir Tindastólsmenn.

Hann hefur skorað 18,1 stig að meðaltali í 74 deildarleikjum sínum í efstu deild á Íslandi.

Badmus er 32 ára gamall Íri sem spilaði á Spáni áður en hann kom fyrst til Íslands fyrir fjórum árum.

Badmus þekkir ástríðufulla stuðningsmenn Stólanna vel og hann sendi þeim skilaboð í gegnum miðla Tindastóls.

„Til stuðningsfólksins. Orka ykkar, ást ykkar og stuðningur. Ég hef saknað þess. Ég er kominn heim. Við skrifuðum söguna einu sinni og nú ætlum við að gera það aftur,“ sagði Badmus á miðlum Tindastóls.

Það er nóg af fréttum af Tindastólsliðinu en félagið réði Arnar Guðjónsson sem þjálfara liðsins í gær. Arnar tekur við af Benedikt Guðmundssyni sem gerði Stólana að deildarmeisturum í vetur og fór með liðið alla leið í oddaleik um Íslandsmeistaratitilinn.