Látinn eftir líkams­á­rás en á­rásar­maðurinn gengur laus

Þetta staðfestir E. Agnes Eide Kristínardóttir, yfirlögregluþjónn miðlægrar rannsóknardeildar Lögreglunnar á höfuðborgarsvæðinu, í samtali við Vísi. Ríkisútvarpið greindi fyrst frá því að maðurinn hefði látist af sárum sínum á sjúkrahúsi um helgina.

Agnes segir að rannsókn málsins sé á frumstigum, hvorki liggi fyrir hvað gekk á þegar árásin var framin né hvert banamein mannsins var. Krufning muni leiða það í ljós.

Maðurinn var handtekinn í kjölfar árásarinnar og úrskurðaður í gæsluvarðhald til 4. þessa mánaðar. Ekki var farið fram á áframhaldandi gæsluvarðhald þegar það rann út. Agnes segir að ekki hafi verið ákveðið að handtaka manninn á ný og fara fram á gæsluvarðhald yfir honum. Þá sé málið ekki rannsakað sem manndráp að svo stöddu.