Breiða­blik búið að semja við Damir

Breiðablik hefur ekki tilkynnt endurkomu Damirs á sínum miðlum, Fótbolti.net greindi fyrst frá að samningnum hefði verið siglt í höfn. Á heimasíðu KSÍ má sjá að Damir er með gildan leikmannasamning frá 1. júlí til 31. desember á þessu ári.

Félagaskiptaglugginn opnar þann 17. júlí og Damir verður gjaldgengur í leik Breiðabliks gegn Vestra í Bestu deildinni þann 19. júlí. 

Damir hefur verið einn mikilvægasti leikmaður Breiðabliks undanfarin ár og varð Íslandsmeistari með liðinu í fyrra en fluttist svo til Brúnei og spilaði með liðinu DPMM í singapúrsku úrvalsdeildinni.

Hann hefur komið hingað til lands og æft með Breiðabliki í fríum. Í viðtali við Vísi fyrr í vetur sagði Damir lífið í Brúnei vera einmanalegt. Planið var alltaf að vera aðeins eitt tímabil úti og koma svo aftur heim.