For­setinn gaf öllum nýja bíla

Úsbekistan tryggði sig inn á HM með 0-0 jafntefli á útivelli á móti Sameinuðu arabísku furstadæmunum en nokkrum dögum síðar vann liðið síðan 3-0 sigur á Katar á heimavelli sínum.

Um leið og leikurinn á móti Katar var flautaður af þá birtust fjörutíu nýir bílar á leikvanginn. Í ljós kom að þarna var forseti Úsbekistan að sýna þakklæti sitt fyrir hönd þjóðarinnar.

Forsetinn gaf leikmönnum og starfsmönnum liðsins nefnilega bílana að gjöf fyrir árangurinn.

Þetta voru rafbílar frá kínverska framleiðandanum BYD. Aftonbladet segir frá.

Shavkat Mirziyoyev hefur verið forseti Úsbekistan frá 2016 en hann var áður forsætisráðherra landsins í þrettán ár.

„Þið létuð draum milljóna fótboltaáhugafólks rætast í okkar góða landi. Úsbekskar íþróttir eiga þetta skilið,“ skrifaði Shavkat Mirziyoyev á samfélagsmiðla.

Landslið Úsbekistan er í 57. sæti á styrkleikalista FIFA. Þekktustu leikmenn þessa eru Abdukodir Khusanov hjá Manchester City og Eldor Shomurodov hjá Roma.