Dæmdur skatt­svikari beri enga á­byrgð á fjár­málum fyrir­tækisins

Í vikunni birtist auglýsing í Morgunblaðinu frá Úrval Útsýn, þar sem sagt er frá sex ferðum um Asíu og Afríku sem fyrirtækið býður upp á. Viktor Sveinsson, sem titlaður er sem sérfræðingur Úrvals Útsýnar, prýðir forsíðu auglýsingarinnar sem er langt viðtal við Viktor sjálfan þar sem hann segir frá ferðunum.

„Það eru fáir lands­menn sem þekkja ferðalög um Asíu og Afr­íku líkt og Vikt­or Sveins­son sér­fræðing­ur hjá Úrval Útsýn, ger­ir en hann á veg og vanda af sex vönduðum sér­ferðum sem kynnt­ar verða á fimmtu­dag­inn næsta, þann 12. júní í Hlíðarsmára 14, sal Li­ons á Íslandi,“ segir í auglýsingunni.

Sátu eftir með sárt ennið

Viktor Heiðdal Sveinsson var í forsvari fyrir ferðaþjónustufyrirtækið Oríental, sem síðar varð Farvel. Farvel hóf starfsemi 2016 og byggði á grunni Oríental sem Viktor hafði stofnað áratug fyrr.

Ferðaskrifstofuleyfi Farvel var skyndilega fellt úr gildi í desember 2019 þar sem fyrirtækið hafði ekki skilað inn tryggingu í samræmi við aukin umsvif fyrirtækisins.

Fjölmargir viðskiptavinir Farvel sátu þá eftir með sárt ennið, eftir að hafa verið látin greiða fyrir ferðir sem aldrei voru farnar.

Sigríður Pálsdóttir og eiginmaður hennar sögðu frá því að tveimur dögum áður en tilkynnt var um lokun ferðaskrifstofunnar hefði Viktor sett sig í samband við eiginmann Sigríðar og beðið hann að leggja inn lokagreiðslu fyrir fyrirhugað ferðalag.

Viktor hafi svo aldrei látið náð í sig eftir það, en Sigríður telur afar ólíklegt að hann hafi ekki vitað af fyrirhugaðri lokun tveimur dögum áður.

Viktor var svo ákærður fyrir meiriháttar brot á skattalögum og peningaþvætti með því að hafa staðið skil á efnislega röngum skattframtölum frá 2014 til 2018, og var hann sakfelldur árið 2021 í Héraðsdómi Suðurlands.

Tekjurnar sem ekki voru taldar upp námu ríflega 81 milljónum króna.

Viktor sjái um skipulag en beri enga ábyrgð á fjármálum

Þórunn Reynisdóttir forstjóri Úrvals Útsýnar, segir að Viktor beri enga fjárhagslega ábyrgð hjá Úrvali Útsýn.

„Hann er með ýmsar ferðir, hann er bara ráðgjafi hjá okkur, ekki fastur starfsmaður. Hann kemur að hönnun ýmissa ferða á þessu svæði sem hann þekkir vel til.“

„Ég ítreka að við berum alla ábyrgð á allri framkvæmd og fjárhagslega hlutanum,“ segir Þórunn.

Ferðir Viktors hafi verið farnar á ábyrgð Úrvals Útsýnar og þær hafi verið algjörlega til fyrirmyndar hingað til.

Ekki náðist í Viktor við vinnslu fréttarinnar.