Bókun 35 aftur rædd fram á nótt

Á vef Alþingis segir að boðað hafi verið til nýs þingfundar klukkan 10:30 og þar verði bókun 35 fyrsta mál á dagskrá. Klukkan níu fer fram fundur í atvinnuveganefnd, sem þingmenn stjórnarandstöðunnar hafa sagst ekki ætla að mæta á. 

Í fundargerð síðasta fundar má sjá að einungis þingmenn Miðflokksins tóku til máls í pontu frá og með klukkan 23:47. Líkt og fyrri daginn tóku til máls þau Bergþór Ólason, Sigmundur Davíð Gunnlaugsson, Karl Gauti Hjaltason, Snorri Másson, Þorgrímur Sigmundsson, Ingibjörg Davíðsdóttir og Nanna Margrét Gunnlaugsdóttir og Sigríður Á. Andersen.

Í ræðum sínum vitnuðu þingmenn í skrif fræðimanna og ræður fyrrverandi þingmanna. Sigríður Á. Andersen flutti síðustu ræðuna sem er tímasett klukkan 02:11 í nótt.