Tíu Þórsarar lönduðu fyrsta sigri sínum í þessum mánuði

Þetta var fjórði deildarsigur Þórsara í sumar en um leið sá fyrsti síðan 30. maí. Þórsliðið hafði aðeins náð í eitt stig út úr síðustu þremur leikjum og að auki dottið út úr Mjólkurbikarnum.

Þórsarar byrjuðu daginn í áttunda sætinu en hoppuðu upp um fjögur sæti með þessum sigri.

Þórsarar enduðu líka tíu á móti ellefu í Boganum í dag en tókst engu að síður að landa öllum þremur stigunum.

Þór var búið að skora bæði mörkin sín þegar þeir misstu mann af velli á 80. mínútu. Sigfús Fannar fékk þá sitt annað gula spjald.

Sigfús Fannar Gunnarsson kom Þór í 1-0 á 33. mínútu og Ragnar Óli Ragnarsson bætti við öðru marki á 74. mínútu.

Þetta var áttunda deildarmark Sigfúsar í sumar og hann er markahæstur í deildinni með einu marki meira en Dagur Orri Garðarsson hjá HK. Hann skorar samt ekki í næsta leik enda á leiðinni í leikbann eftir rauða spjaldið.