Tíu Þjóðhátíðarráð Arons Mola: „Ekki fara í tjörnina “

Aron þekkir hátíðina eins og lófann á sér og byggir listann á eigin reynslu. Hér eru hans bestu „do’s and don’ts,“ beint úr dalnum. 

Hlutir sem þú átt að gera á Þjóðhátíð

Taktu bátinn yfir á föstudegi, helst fyrir hádegi

„Bestu bátarnir fara á milli klukkan 10 og 12. Ef veðrið er gott þá jafnast fátt á við þá ferð.“

Hafðu regnföt með þér – þau eru lykilatriði

„Þú situr oft í grasinu og það er nánast alltaf smá bleyta eftir nóttina.“

Farðu í hvítu tjöldin – en með leyfi

„Það er auðvelt að fá leyfi, svo lengi sem þú sýnir kurteisi og virðingu. Dyrnar eru opnar þeim sem kunna að haga sér. Síðan hjálpar líka til að kunna tvö, þrjú góð lög á gítar.“

Drekktu steinefni

„Drekktu nóg af steinefnum, það hjálpar við að halda vökvajafnvægi.“

Borðaðu reglulega 

„Mundu að fá þér þrjár máltíðir á dag. Ekki gleyma að fá eitthvað í mallann – fólk fer oft beint í bjórinn, sem endar með lítilli orku, svefni og prjóni. Það eru margir góðir staðir til að borða á svæðinu.“

Mættu á Lundann á laugardeginum!

„Þessi viðburður er ómissandi hluti af hátíðinni.“

Hlutir sem þú átt alls ekki að gera

Ekki prjóna yfir þig á föstudeginum

„Ef þú ert oft drukkinn á föstudeginum endar það oft illa. Endar oft með því að þú ert leiðinlegur við vini þína.“

Ekki fara í tjörnina – sama hversu góð hugmynd það virðist

„Það virðist góð hugmynd í augnablikinu – en þú sérð eftir því daginn eftir. Það gerist á hverju ári. Þetta er ömurleg pæling daginn eftir.“

Ekki pissa í brekkuna

„En ef þú getur ekki annað farðu þá alveg efst upp að hliðunum og leystu málið þar.“

Ekki fara á hopphjól

„Ef þú dettur og meiðir þig, þá er hátíðin sem þú ert búinn að bíða eftir allt sumarið bara búin fyrir þig. Labbaðu í fimmtán mínútur frekar en að taka hopp í fimm.“

Ekki mæta mökkaður í brekkusönginn

„Það er allt í lagi að vera aðeins kenndur. Þú átt samt að vera með á nótunum þegar hann byrjar.“

Hægt er að hlusta á þáttinn í heild sinni í spilaranum hér að neðan.