Segja manninn hafa glímt við al­var­leg veikindi

Þetta fullyrðir fréttastofa RÚV en lögreglan hefur ekki viljað tjá sig frekar um málið.

Samkvæmt umfjöllun RÚV var maðurinn frá Nýju Kaledóníu, eyjaklasa í Suðvestur-Kyrrahafi sem tilheyrir Frakklandi. Konan er aftur á móti fædd í Frakklandi en foreldrar hennar eru frá Asíu.

Þau áttu aðeins þessa einu dóttur, sem fannst látin ásamt föður sínum í herberginu. Bæði áttu þau systkini sem lögreglan hefur verið í samskiptum við.

Eins og greint hefur verið frá er franska konan á sextugsaldri og er hún grunuð um að hafa ráðið eiginmanni sínum og dóttur bana. Gæsluvarðhald yfir henni var framlengt um tvær vikur fyrir helgi og gildir til 4. júlí.

Samkvæmt umfjöllun RÚV gisti fjölskyldan allar nætur ferðalagsins á Edition hótelinu, en fór í dagsferðir um landið og hegðaði sér þannig eins og hefðbundnir ferðamenn. 

Þau hafi komið hingað 7. júní og verið með tvö herbergi bókuð á hótelinu, og hafi átt að fljúga aftur til Dyflinnar morguninn sem maðurinn og dóttirin fundust látin, en eins og greint hefur verið frá bjó fjölskyldan í Dyflinni á Írlandi.

Sagt er að fjölskyldan hafi verið efnuð, og hafi flutt frá Frakklandi til Dyflinnar árið 2017.

Ekkert þeirra sé á hefðbundnum samfélagsmiðlum og því litlar upplýsingar um fólkið að finna á netinu.