„Aldrei grátið jafn mikið af gleði“

Hvenær og hvernig trúlofuðust þið?

Elsku Siggi Kjartan bað mín með mjög óhefðbundnum hætti eins og allt sem hann gerir þann 24.08.2023.

Hvað voruð þið búin að vera lengi að skipuleggja stóra daginn?

Við ætluðum að gifta okkur heima þar sem allt okkar nánasta fólk gæti séð sér fært að koma saman og fagna ástinni en svo missti ég elsku Rósu frænku, móðursystur mína, í apríl í fyrra og í framhaldi af því sannfærði ég Sigga um að leggja land undir fót.

Vissuð þið strax að þið vilduð gifta ykkur erlendis og er Ibiza í uppáhaldi hjá ykkur?

Sigga langaði í sveitabrúðkaup sem er æði og mig langaði að vera í fallegum hælum og skvísa yfir mig svo við vorum ekki alveg á sömu blaðsíðu á fyrsta degi. En svo fórum við til Ibiza í fyrsta skipti í september í fyrra með yndislegum vinum og urðum ástfangin af eyjunni. 

Tulum í Mexíkó er uppáhalds staður okkar SK (Sigga Kjartans) og Ibiza minnti okkur svo ótrúlega á Tulum svo já Ibiza er nú svo sannarlega í uppáhaldi.

Við fundum stað á netinu sem heitir Nikki Beach en við höfðum ekki komið þangað. Við settum okkur í samband og þau samskipti voru svona „island-time“ samskipti en eins og allir vita gerast góðir hlutir hægt og þau voru frábær og staðurinn fullkominn fyrir brúðkaupið okkar.

Nú höfum við SK farið tvisvar til Ibiza og höfum lært að það gerast bara góðir hlutir á þessari mögnuðu eyju.

Hvernig var brúðkaupsdagurinn?

Dagurinn var draumi líkastur, í faðmi fjölskyldu og vina. Flest af okkar besta fólki saman komið á þennan ótrúlega fallega stað að njóta lífsins saman með okkur, hlæja, gráta og faðmast. 

Dóttir söng, sonur fór með ljóð, foreldrar, bestu frænkur og vinir héldu ræður og sungu lög. 

Ég held ég hafi aldrei grátið jafn mikið af gleði og upplifað jafn margar hráar og fallegar tilfinningar á skömmum tíma. Dagurinn hefði bara ekki getað verið betri.

Voruð þið með nokkra daga af fjöri í tengslum við brúðkaupið?

Allir dagar voru fullir af lífi og fjöri, fjölskylda og vinir komu inn og út á sitthvorum tímanum, sumir á undan okkur og aðrir voru lengur en við, alltaf fullt hús af fólki og gleði.

Við söfnuðumst saman í fordrykk daginn fyrir brúðkaupið okkar á yndislegum rooftop bar þegar flestir voru komnir og skáluðum fyrir því að við værum öll þarna saman komin alla leið til Ibiza.

Fyrri partur brúðkaupsdagsins var tekinn í húsinu sem við gistum í. Við vöknuðum og tókum daginn saman með fjölskyldunni. Þóra frænka greiddi skvísum og við fórum í förðun. 

Fólk æddi inn og út og spreyjaði gleði út í loftið og svo röltum við yfir á Nikki Beach sem var við hliðina á húsinu okkar og hótelinu sem flestir gistu á. Allt ótrúlega einfalt og geggjað, dagurinn var fullur af ást og gleði frá morgni og langt fram á nótt.

Daginn eftir brúðkaupið fórum við svo í bátsferð með vinum sem gátu stigið ölduna og dansað á sama tíma og svo beint á geggjaðan klúbb með sjóriðu og dönsuðum saman inn í nóttina með plötusnúðinum Frank Mercier.

Voruð þið sammála í skipulaginu?

Siggi var framkvæmdastjóri í öllu sem við kom þessu stórkostlega brúðkaupi og sá um allt sem snéri að því að bóka, græja og gera. 

Ég var spurð nokkrum sinnum hver væri „my wedding planner“ og það var sko hann. Hann á svo sannarlega hrós skilið að hafa náð að safna okkur öllum saman á lítið svæði en því fylgdi svo mikil nánd. Allir saman, gaman allan tímann.

En hvað skipulag varðar þá vorum við alltaf sammála í grunninn. Við vorum með áherslur á mismunandi stöðum og fengum því bæði að ráða för.

Hvaðan sóttuð þið innblástur?

Innblásturinn kom frá Tulum í Mexíkó í mat, drykk, blómum og litapallettu enda erum við mega aðdáendur.

Hvað stendur upp úr?

Samveran með öllu okkar yndislega fólki sem hafði tök á því að koma og vera með okkur. Allar fallegu ræðurnar, ljóðin, söngvarnir og allar fallegu kveðjurnar frá þeim sem gátu ekki verið með okkur. 

Einnig hvað allir voru boðnir og búnir að leggja hönd á plóg til að gera daginn okkar yndislegan frá A-Ö. Að finna svona mikinn kærleik eru mikil forréttindi og er ég ólýsanlega þakklát.

Voru einhver skemmtiatriði eða veislustjórar?

Við vorum með bestu veislustjóra í heimi. Hina einu sönnu Helgu Lilju Helicopter fatahönnuð- og koddaslags drottningu og hinn eina sanna Ragnar Jón blaða- og tónlistarmann.

Hvað voru margir gestir?

Við buðum rúmlega hundrað manns og héldum að við værum heppin ef kæmu þrjátíu í ljósi kílómetrafjölda en ótrúlegt en satt fengum við yfir hundrað elskur að fagna með okkur og er ég ennþá í losti yfir því. Takk!

Var eitthvað sem kom ykkur á óvart?

Það sem kom okkur sjálfsagt mest á óvart var að finna þennan mikla samhug og kærleika úr öllum áttum, hvað voru margir til í að leggja á sig tvö flug, púsluspil og alls kyns vesen til að vera með okkur.

Hvernig gekk að velja kjólinn? Varstu með fataskipti?

Ég var svo sultuslök allan tímann í undirbúningnum, enda með SK á kantinum að græja allt og sjá um öll samskipti. Við erum bæði alltaf ótrúlega upptekin í vinnu svo ég hafði engan tíma til að ofhugsa eitt né neitt í raun.

Ég var bara í Basel að vinna í Eurovision rétt fyrir brottför en er ekki óvön því að þurfa hrista fram lúkk hér og þar í verkefnum með litlum fyrirvara svo ég fór ekkert að ofanda fyrr en korter í brúðkaup, en þá var ég ekki ennþá kominn með kjól.

Það var smá brekka. Ég var með rosa flott Pinterest mood board sem ég gat því miður ekki klætt mig. 

Þannig að sem svo oft áður fann mín besta kona Heba sem er með Svart Studio efnið sem mig langaði í og klæðskerar lífs míns þær Lísa Hjaltested og Birna Sigurjónsdóttir saumuðu fyrir mig kjólinn og korsettuna sem mig langaði í á tíu mínútum. 

Að því loknu settist ég svo niður nokkur kvöld og skreytti með perlum og steinum sem er mín nýja uppáhalds hugleiðsla.

Ertu með eitthvað gullið ráð fyrir verðandi hjón sem eru að skipuleggja brúðkaup?

100 prósent. Engar hugmyndir eru asnalegar, ekki gera neitt eins og það „á að vera“ eða er vanalega gert í brúðkaupi heldur bara nákvæmlega eins og ykkur langar að hafa það. 

Ég vildi hamborgara og SK eitthvað annað svo við gerðum bæði, ekkert þarf að passa saman eða meika sens. Þetta er dagurinn ykkar og hann á að vera ykkar fyrir ykkur og allir elska ykkur.

Við fengum þá góðu áminningu að treysta útkomunni og vera í flæði því það er alltaf besta leiðin. Eina leiðin. 

Þetta var stress inn á milli hjá okkur vissulega ekki misskilja mig en stressið var óþarft í raun því allt kom þetta heim og saman með ótrúlegum samhug þegar öllu var á botninn hvolft. Allt sem fór öðruvísi en hafði verið planað gerði það bara enn skemmtilegra.

Hér má sjá fleiri skemmtilegar myndir frá þessum ævintýraríka degi á Ibiza: