Gæti fengið fjögurra ára bann fyrir að reyna að fá gult spjald

Þessi 25 ára gamli markvörður Udinese er nefnilega sakaður um að hafa reynt að fá gult spjald í leik í Seríu A.

Ítalska blaðið Corriere dello Sport segir frá því að mál Okoye sé komið fyrir aganefnd ítalska knattspyrnusambandsins.

Hann verður líklegast ákærður fyrir hagræðingu úrslita og refsingin gæti orðið fjögurra ára bann.

Atvikið sem um ræðir gerðist í leik Udinese og Lazio 11. mars síðastliðinn. Okoye nældi sér þá í gult spjald fyrir leiktöf.

Atvikið varð á 64. mínútu leiksins en á þeim tíma tóku menn eftir því að óeðlilega margir höfðu veðjað á það að markvörðurinn fengi gult spjald í leiknum.

Okoye er því sakaður að hafa svindlað í samtogi við aðra aðila með því að semja við þá um að fá gult spjald í leiknum.

Alls voru greiddar út 120 þúsund evrur í gróða fyrir þá sem veðjuðu á gult spjald hjá Okoye en það eru sautján milljónir í íslenskum krónum.