„Ég var örugg­lega getinn í Land Rover“

Hrannar Ingi Óttarsson er líklega aðdáandi númer eitt á Íslandi af Land Rover bílum en hann hefur dáðst af bílategundinni frá því að hann var lítill strákur. Hér er til dæmis fyrsti bílinn hans, Land Rover 1967, sem hann fékk í fermingargjöf og í kjölfarið gerði hann bílinn allan upp og er hann nú einn af glæsilegustu bílum á götum Akureyrarbæjar.

„Svo náttúrulega er þessi ægilega góður. Ég fékk þennan fyrir nokkrum árum og það er þessi hérna. Þessi er helvíti góður, 1961 árgerð, mjög lítið til af þeim bílum, tók hann líka í gegn. Þetta er allt uppáhalds, maður getur ekki gert upp á milli barnanna sinna,“ segir Hrannar hlæjandi.

En hvað er það við Land Rover, sem er svona heillandi?

„Þetta er bara allt öðruvísi en allir aðrir bílar. Þú getur bara gert þá upp alveg eftir þínu höfði“.

Hrannar Ingi segir að hann veki alltaf mikla athygli á Land Roverbílunum sínum á götum Akureyrar eða á öðrum stöðum þar sem hann er á ferðinni.

Hvað segja stelpurnar þegar þær sjá þig á ferðinni?

„Þær eru ánægðar með þetta,“ segir hann og hlær enn meira.

Hrannar Ingi hrósar pabba sínum sérstaklega, sem hvetur hann áfram í Land Rover verkefnunum sínum.

En hvað á Hrannar marga Land Rovera?

„Það breytist alltaf eitthvað aðeins. Þetta er bara eins og með hestamenn, maður veit ekki töluna á bílunum, það er bara þannig“.

Og ætlar þú að halda áfram að vera Land Rover áhugamaður númer eitt á Íslandi?

„Já, ég átti örugglega aldrei séns, ég var örugglega getinn í Land Rover, já ég mun alltaf vera í þessu, það held ég, ég elska þetta,“ segir Hrannar Ingi kampakátur með lífið og alla Land Rover bílana sína.