Skotinn til bana þegar hann söng Linkin Park á karókíkvöldi

Atvikið átti sér stað á veitingastaðnum Louie's Corner House föstudaginn 11. júlí síðastliðinn. Hinn 42 ára Benjamin „Donkey“ Hawk var staddur uppi á sviði þegar hinn 59 ára Richard Lindgren gekk inn á barinn og skaut Hawk í hnakkann.

Að sögn lögregluyfirvalda í Licking-sýslu er Lindgren fyrrverandi eiginmaður kærustu Hawk en þau höfðu verið að deita í nokkra mánuði. Kærustuparið var uppi á sviði saman þegar Hawk var skotinn til bana.

Eftir skotárásina yfirgaf Lindgren barinn og flúði til Orangesburg í Suður-Karólínu sem er í um 900 kílómetra fjarlægð. Lindgren var handtekinn þar og situr nú í gæsluvarðhaldi þar sem hann bíður þess að vera fluttur til Ohio.

Hawk skilur eftir sig tvær dætur og hafa aðstandendur hans stofnað styrktarsíðu fyrir jarðarför hans. Að sögn bróður Hawk var hann dáður og elskaður í karókísamfélagi bæjarins en hann fór alla leið í úrslit í ríkisbikarkeppni í karókí.

„Hann gekk bara inn, skaut hann og gekk út“

Plötusnúðurinn Robert Humble var á staðnum þegar skotárásin átti sér stað og sagði við fréttastofu ABC 6 að það hefðu ekki verið nein átök eða spenna í aðdraganda skotárásarinnar. 

„Hann gekk bara inn, skaut hann og gekk út,“ sagði Humble um hegðun Lindgren. 

Þrátt fyrir að það hefðu ekki verið nein átök þennan dag segir Humble að Lindgren hafi reglulega áður svívirt fyrrverandi konu sína á meðan hún var uppi á sviði með því að hreyta fúkyrðum í hana. 

„Hann uppnefndi hana, gerði lítið úr persónu hennar,“ sagði Humble við fréttamiðilinn. 

Tveimur vikum áður hafði plötusnúðurinn varað Lindgren við því að ef hann héldi áfram að haga sér svona þá fengi hann ekki að koma aftur inn á staðinn.