„Clinton á­ætlunin“ lík­lega til­búningur rúss­neskra njósnara

Þetta meinta ráðabrugg Clinton frá 2016 hefur gengið undir nafninu „Clinton áætlunin“.

Ríkisstjórn Trumps svipti í gær leynd af skjölum úr rannsókn Durhams sem sýna að talið er að skjöl sem mynda grunninn að áðurnefndri kenningu hafi líklega verið búin til af rússneskum njósnurum. Skjölin voru send til leyniþjónustumálanefndar öldungadeildarinnar og birt af Chuck Grassley, formanni nefndarinnar.

Trump-liðar hafa svipt hulunni af ýmsum gögnum sem tengjast Rússarannsókninni að undanförnu, að virðist með því markmiði að reyna að draga úr ólgunni á hægri væng stjórnmála í Bandaríkjunum vegna Epstein-skjalanna svokölluðu.

Sjá einnig: Deilur Repúblikana um Epstein-skjölin magnast enn

Samhliða opinberun þessara gagna hafa starfsmenn Trumps ítrekað sagt ósatt um hvað þau sýna fram á og jafnvel haldið því fram að þau sýni fram á að Barack Obama, fyrrverandi forseti, hafi framið landráð.

Eins og fram kemur í frétt New York Times á það einnig við þessi nýjustu skjöl. John Ratcliffe, yfirmaður Leyniþjónustu Bandaríkjanna (CIA), hélt því til að mynda fram í yfirlýsingu gær að þessi nýju skjöl staðfestu að Rússarannsóknin hefði verið byggð á lygum og skipulagðri herferð gegn Donald Trump.

Kash Pate, yfirmaður Alríkislögreglunnar (FBI) sem á sér langa sögu ósanninda í tengslum við Rússarannsóknina, sagði einnig að skjölin sem send voru til öldungadeildarinnar í gær sönnuðu að framboð Hillary Clinton hefði lagt á ráðin um að koma sök á Trump og Rússarannsóknin hefði verið byggð á lygum.

Hið rétta er að gögnin sýna hið andstæða.

Átti að rannsaka rannsóknina

John Durham var skipaður í embætti sérstaks rannsakanda af William Barr, fyrrverandi dómsmálaráðherra, í byrjun árs 2019. Hann varði tæpum fjórum árum í að fara í saumana á Rússarannsókn Alríkislögreglu Bandaríkjanna og Roberts Muellers, annars sérstaks rannsakanda.

Rannsókn Duhams tók lengri tíma en Rússarannsóknin sjálf og skilaði afar litlum árangri. Um tíma rannsakaði Durham sjálfan Trump.

Sjá einnig: Leyni­leg Rússamappa hvarf á síðustu dögum Trumps í Hvíta húsinu

Durham tókst ekki að finna vísbendingar um að lög hafi verið brotin í tengslum við Rússarannsóknina né tókst honum að finna vísbendingar um að Hillary Clinton og hennar fólk hafi komið að rannsókninni eða bendlað Trump við Rússa. Hann gaf það þó í skyn í skýrslu sem hann skrifaði um rannsókn sína.

Hann lagði fram ákærur gegn tveimur mönnum og sakaði þá um að hafa sagt rannsakendum ósatt en báðir voru fljótt sýknaðir. Í lokaskýrslu sinni skrifaði Durham þó að FBI hefði ekki haft tilefni til að hefja Rússarannsóknina á sínum tíma.

Ítarlega var fjallað um rannsókn Durhams á Vísi árið 2023, þegar í ljós kom að hann hafði haft Trump til rannsóknar um tíma.

Ríkisstjórn Trumps opinberaði í gær viðbót við skýrslu Durhams. Sú viðbót, sem var ekki birt opinberlega á sínum tíma með skýrslu Durhams, sýnir fram á að Durham og rannsakendur hans lögðu mikið kapp á að sanna að áðurnefndir tölvupóstar væru raunverulegir. Að endanum komust þeir þó að þeirri niðurstöðu að svo væri ekki.

Fengu minnisblöð frá hollenskri leyniþjónustu

Í tiltölulega stuttu máli sagt snýst málið um minnisblöð sem Bandaríkjamenn fengu frá hollenskri leyniþjónustu en þau munu hafa fundist á vefþjóni rússneskrar leyniþjónustu sem Hollendingar komust inn á. Minnisblöðin innihéldu lýsingar á tölvupóstum Bandaríkjamanna sem áttu að hafa verið fórnarlömb rússneskra tölvuþrjóta.

Þar á að hafa komið fram að Hillary Clinton hafi samþykkt sérstaka herferð sem ætlað var að bendla Trump við Rússland. Þannig átti hún að vilja hylma yfir „tölvupóstamálið“ svokallaða, þar sem hún var sökuð um að notast við einkavefþjón fyrir opinbera tölvupósta sína í starfi sínu sem utanríkisráðherra á árum áður.

Sjá einnig: Segja Clinton hafa brotið reglur varðandi tölvupósta

Á fyrra kjörtímabilil Trumps kom í ljós að þó nokkrir starfsmenn hans gerðu hið sama. Clinton kallaði Trump-liða hræsnara af því tilefni á sínum tíma.

Sá sem átti að hafa sent áðurnefndan póst um að Clinton hefði samþykkt ráðabruggið um að koma sök á Trump heitir Leonard Benardo og var varaforseti Open Society Foundations, sem er góðgerðarsjóður í eigu ungverska auðjöfursins George Soros, sem er vinsæll skotspónn samsæringa víða um heim.

Benardo var einnig sagður hafa skrifað póst um að ráðgjafi Clintons hafi lagt til áætlun um að bendla Trump við Vladimír Pútín, forseta Rússlands, og gera grýlu úr þeim saman, með aðstoð FBI.

Í einu minnisblaðinu var fjallað um meint samskipti Benardos við Debbie Wasserman, bandaríska þingkonu. Þau áttu að hafa rætt sín á milli um það að Loretta E. Lynch, dómsmálaráðherra í forsetatíð Baracks Obama, myndi tryggja að rannsókn á tölvupóstum Hillary Clinton yrði kæfð.

Benardo og Wasserman sögðust þó ekki þekkjast. Þau hefðu aldrei hist og aldrei sent tölvupósta sín á milli um Hillary Clinton.

Clinton sagði sjálf í viðtali við rannsakendur Durhams að minnisblöðin væru þvæla og tók starfsfólk hennar undir það. Nokkrir úr hennar innsta hring lýstu minnisblöðunum sem „fáránlegum“.

Fann ekki póstana á vefþjónum

Minnisblöðin rússnesku innihéldu mismunandi útgáfur af minnst einum tölvupósti og Benardo þvertók fyrir að hafa sent þessa pósta. Enginn af þeim sem eiga að hafa sent umrædda tölvupósta eða tekið við þeim sögðust kannast við að hafa séð þá áður.

Þá fékk Durham aðgang að nokkrum vefþjónum sem hefðu átt að innihalda tölvupósta úr minnisblöðunum en þeir fundust ekki. Þar fundust þó aðrir póstar sem innihéldu svipað orðalag og fram kom í minnsblöðunum.

Í viðbótinni við skýrslu sína skrifaði Durham að líklegast væri að póstarnir úr minnisblöðunum rússnesku væru tilbúningur. Þeir hefðu líklega verið gerðir með því að sauma saman aðra tölvupósta sem rússneskir tölvuþrjótar komu höndum yfir í árásum á bandarískar hugveitur sem þykja vinstri sinnaðar.