Vilja ekkert með á­fengi ná­granna sinna hafa

Flöskur frá Jack Daniel‘s og öðrum bandarískum fyrirtækjum hafa að mestu verið fjarlægðar úr hillum verslana í Kanada sitja þær í massavís í geymslum víðsvegar um landið. Í staðinn hafa starfsmenn þessara verslana komið fyrir áfengi frá kanadískum fyrirtækjum.

Í samtali við Wall Street Journal segir ritstjóri kanadísks tímarits um viskí að þegar hann hefur verið að halda viskísmakkanir, hafi viðskiptavinir beðið hann um að bjóða eingöngu upp á viskí frá Kanada, Írlandi og Skotlandi. Ekki bjóða upp á viskí frá Bandaríkjunum.

„Rauði þráðurinn var sá að þeir voru að sniðganga Bandaríkin,“ sagði Mike Brisebois.

Þessa breytingu má að mestu rekja til mjög harðra efnahagslegra aðgerða og hótana Donalds Trump, forseta Bandaríkjanna, í garð Kanada. Eins og frægt er hefur hann meðal annars talað um að þvinga Kanada með efnahagslegum aðgerðum til að verða hluti af Bandaríkjunum.

Sjá einnig: Vill refsa Kanada svo lesið verði um það í sögu­bókum

Á þeim sex mánuðum síðan hefur innflutningur Kanadamanna á bandarísku áfengi nánast alveg þornað upp, ef svo má segja.

Salan nánast engin

The Distilled Spirits Council, hagsmunasamtök áfengisframleiðenda í Bandaríkjunum, áætla að útflutningur sterks áfengis til Kanada hafi á fyrstu sex mánuðum ársins dregist saman um 62 prósent, samanborið við fyrri hluta síðasta árs. Útflutningur víns til Kanada hefur dregist saman um 67 prósent.

DSC sendi á dögunum bréf til Hvíta hússins þar sem lýst var yfir áhyggjum af stöðunni þegar kemur að tollaaðgerðum Trumps í garð Evrópusambandsins.

Staðan er þó enn verri þegar kemur að sölu í Kanada.

Vísað er til Ontario-fylkis, fjölmennasta fylkis Kanada, þar sem bandarískt áfengis seldist fyrir rúmar sjö hundruð milljónir dala í fyrra. Nú er salan sögð svo gott sem engin.

WSJ hefur eftir hagsmunasamtökum vínframleiðenda í Kaliforníu að þeir hafi tapað rúmlega 173 milljónum dala á sniðgöngunni í Kanada. Þessir framleiðendur seldu 35 prósent alls víns þeirra í Kanada í fyrra.

„Kvikindislegir og illgjarnir“ Kanadamenn

Pete Hoekstra, sendiherra Bandaríkjanna í Kanada, sagði á ráðstefnu í Washington DC í síðasta mánuði að stór ástæða þess að Trump talaði um að Kanadamenn væru „kvikindislegir og illgjarnir“ væri sniðganga þeirra á bandarísku áfengi.

Þau ummæli féllu ekki í kramið í Kanada en forsætisráðherra Bresku Kólumbíu sagði til að mynda að ráðamenn í Bandaríkjunum virtust hafa mjög takmarkaðan skilning á því hve móðgandi ummæli þeirra í garð Kanada væru.

„Halda þeir að Kanadamenn muni ekki bregðast við þegar forsetinn segir: „Ég vil gera ykkur að 51. ríkinu og brjóta ykkur annars niður efnahagslega“?“ spurði David Eby, umræddur forsætisráðherra, í viðtali við Ríkisútvarp Kanada.

Finna fyrir færri Kanadamönnum í Las Vegas

Það eru ekki bara bandarískir áfengisframleiðendur sem hafa fundið fyrir reiði Kanadamanna. Það hafa eigendur hótela og spilavíta í Las Vegast einnig gert. Þar hefur ferðamönnum fækkað verulega en það sem af er ári er áætlað að þeim hafi fækkað um ellefu prósent, eins og fram kemur í frétt CBC.

Tölfræði frá flugvöllum í Kanada sýnir að gífurlegan samdrátt í fjölda farþega þaðan til Kanada.

Þegar litið er til þriggja stórra kanadískra flugfélaga fóru tæplega 87 þúsund manns frá Kanada til Las Vegas í júní. Í júní í fyrra var fjöldinn 132 þúsund.

Forsvarsmenn nokkurra af stærstu hótelunum og spilavítunum í Las Vegas hafa nefnt fækkun viðskiptavina frá Kanada í samtölum við fjárfesta vegna ársfjórðungsuppgjöra. Þeir segja fækkunina hafa komið niður á rekstrinum en ferðamönnum frá öðrum ríkjum hefur einnig fækkað í borginni.