Hafa aftur­kallað yfir 6.000 námsmannaleyfi

Fox News greindi fyrst frá en meðal þeirra brota sem námsmennirnir eru sagðir hafa framið eru innbrot, líkamsárásir og akstur undir áhrifum.

Þá segir í svörum talsmanns utanríkisráðuneytisins að 200 til 300 námsmannaleyfi hafi verið afturkölluð vegna „stuðnings viðkomandi við hryðjuverkastarfsemi“. 

Þetta er ekki útskýrt nánar en hafa ber í huga að stjórnvöld hafa sakað námsmenn um stuðning við hryðjuverkastarfsemi með því einu að mæta á mótmæli til stuðnings íbúum Gasa.

Stjórnvöld vestanhafs greindu frá því í apríl síðastliðnum að umsækjendur um námsmannaleyfi mættu eiga von á því að samfélagsmiðlar þeirra yrðu skoðaðir, meðal annars til að leita að vísbendingum um gyðingaandúð, og þá var greint frá því í júní að gerð yrði krafa um að umsækjendur heimiluðu öllum aðgangi að síðum sínum.

Erlendum nemum hefur verið hótað um brottvísun eftir að hafa skrifað blaðagreinar eða færslur á samfélagsmiðla sem ganga í berhögg við afstöðu og stefnu stjórnvalda.