Netvís tekur við af SAFT

Netvís starfar undir Fjölmiðlanefnd og heyrir undir menningar-, nýsköpunar- og háskólaráðuneytið. Netvís mun samkvæmt tilkynningu gegna hlutverki miðlægrar upplýsingamiðstöðvar um félagslegt netöryggi og miðlalæsi og á að vera leiðandi í rannsóknum, fræðslu, forvörnum og vitundarvakningu á því sviði. Meginmarkmið miðstöðvarinnar verður að efla þekkingu, hæfni og vitund almennings til öruggrar og ábyrgrar þátttöku í stafrænu samfélagi, með sérstakri áherslu á vernd barna og ungmenna gegn ofbeldi og misnotkun á netinu.

„Það er mikið gleðiefni að geta loksins svipt hulunni af afrakstri vinnu síðustu ára og kynnt Netvís til leiks. Netöryggi snertir okkur öll og á sér tvær hliðar, þ.e. bæði tæknilegt og félagslegt. Í netöryggisáætlunum landsins ætti alltaf að horfa bæði til þess að tryggja tæknilega innviði og vernda fólk sem notendur. Sviðið teygir anga sína víða, allt frá fræðslu til barna og ungmenna, yfir í alþjóðlegt samstarf og að standa vörð um lýðræði og þjóðaröryggi. Stofnun Netvís er löngu tímabært skref og hlökkum við til þess að vinna markvisst að því að efla hugtakaskilning, vitund og valdeflingu almennings á þessu sviði“, segir Skúli Bragi Geirdal, sviðsstjóri Netvís – Netöryggismiðstöðvar Íslands.

Stýrihópur Netvís er skipaður fulltrúum ráðuneyta og helstu samstarfsaðila og sérstakt ráðgjafaráð þess tryggir breiða og öfluga þátttöku mismunandi hagsmunaaðila. Hægt er að kynna sér málið betur á vef miðstöðvarinnar, netvis.is.

Í tilkynningu segir að starfsfólk miðstöðvarinnar muni vera virkir þátttakendur í alþjóðlegu samstarfi um netöryggi og miðlalæsi í gegnum evrópsku tengslanetin Insafe og INHOPE, sem sameina netöryggismiðstöðvar og ábendingarlínur víðsvegar um Evrópu. Einnig mun Netvís taka þátt í samstarfi á vettvangi EBMS og EPRA, þar sem áhersla verður lögð á vernd lýðræðisins með auknu viðnámsþoli þjóða gegn upplýsingaóreiðu.