„Gæti ekki verið stoltari af mínum mönnum“

„Þetta var ótrúlegt framlag frá strákunum í kvöld. Hver maður barðist til síðasta blóðdropa. Þetta var erfiður leikur gegn frábæru liði, ekki bara fótboltaliði heldur líka líkamlega sterku liði, en við börðumst fram á síðustu mínútu og sýndum sterkan karakter og lærðum líka svolítið af síðasta leik,“ sagði Arnar í samtali við Val Pál Eiríksson eftir leik.

„Við vorum agaðir og skipulagðir. Auðvitað kom það einstaka sinnum fyrir að þeir náðu að brjóta okkur á bak aftur enda fljótir og leiknir. En við héldum okkur alltaf inni í augnablikinu og ég var ánægðastur með það. Þú vilt að liðið sé að bæta sig leik frá leik.“

Skömmu fyrir jöfnunarmark Frakka gerði Arnar skiptingu, setti Jón Dag Þorsteinsson inn á fyrir Loga Tómasson og færði Mikael Egil Ellertsson yfir á vinstri kantinn. Það virtist riðla varnarleik Íslands.

Þeirra gír er kraftmeiri en okkar

„Maður sá að um leið og við skoruðum í fyrri hálfleik skiptu þeir um gír. Boltinn gekk hraðar, þeir voru sterkari í návígum og í hálfleik töluðum við um að við þyrftum að bæta okkur um gír líka. En þeirra gír er aðeins kraftmeiri en okkar. Síðan er oft happa og glappa hvernig þær takast til en svo kom jöfnunarmarkið upp hægra megin. Það var frábært mark,“ sagði Arnar.

„Ég var ánægður með það. Það er einmanalegt úti á velli þegar þú lendir svona undir og ég þekki þessa tilfinningu sjálfur, þegar þú ert að spila á móti sterku liði getur þér liðið mjög illa. En þeir sem komu inn á stóðu sig allir hrikalega vel, voru fljótir að koma sér inn í leikinn og við þurftum líka að skipta þar sem menn voru gjörsamlega búnir á því. Við þurftum að fá ferskar lappir inn og ég gæti ekki verið stoltari af mínum mönnum.“

Hefðum tapað 12-0

Arnar var ánægður með hvernig Ísland svaraði fyrir sig eftir að hafa lent undir.

„Það sem ég var ánægðastur með í kvöld var að inn á milli náðum við góðum pressuköflum. En það sáu það allir að ef við hefðum gert það í níutíu mínútur hefðum við tapað þessum leik 12-0. Við áttum okkar augnablik sem er nauðsynlegt því ef við hefðum setið í lágblokk allan leikinn hefði þetta endað illa,“ sagði Arnar.

„Við náðum allt í lagi spilköflum, sérstaklega í fyrri hálfleik en minna í þeim seinni. En ég held að það hafi verið út af því að kollegi minn [Didier Deschamps] hafi öskrað aðeins á þá í hálfleik og beðið þá um að ýta liðinu ofar, taka meira á því og fá meiri hraða. En leikstjórn okkar í kvöld var virkilega til fyrirmyndar.“

Frábært stig í kvöld

Ísland fékk eitt stig út úr leikjunum tveimur í þessum landsleikjaglugga. Arnar hefði viljað hafa þau fleiri en gengur sáttur frá borði með frammistöðu íslenska liðsins.

„Hver leikur er ótrúlega mikilvægur og erfiður og allir þurfa að vera með einbeitinguna í lagi; ég, leikmenn og þjóðin þannig að við séum samstíga í þessu. Þessi gluggi fór ekki alveg jafn vel og við vonuðumst eftir stigalega séð en við fengum frábæra frammistöðu á móti Úkraínu og frábært stig í kvöld. Aldrei gleyma því,“ sagði Arnar.