Eig­andi skrif­stofu í Kringlunni þarf að borga fyrir aug­lýsingar

Þetta var niðurstaða Hæstaréttar, sem kvað upp dóm í málinu klukkan 14. Áður hafði Landsréttur komist að þeirri niðurstöðu að Kringlan þyrfti að endurgreiða kostnaðinn, að því leyti sem eigandi skrifstofunnar hafði gert fyrirvara um greiðsluskyldu sína, alls um 820 þúsund krónur.

Í dómi Hæstaréttar segir að einkahlutafélagið IK holdings ehf. hefði höfðað mál á hendur Rekstrarfélagi Kringlunnar, húsfélagi verslunarmiðstöðvarinnar, til endurgreiðslu þess hluta húsgjalda sem það hafði innt af hendi á tilteknu tímabili sem þátt í kostnaði húsfélagsins vegna auglýsinga- og kynningarstarfsemi.

IK holdings er í eigu hjónanna Ingva Týs Tómassonar og Kristínar Sigríðar Gunnarsdóttur. Ingvi Týr er sonur Tómasar A. Tómassonar, sem kenndur er við Hamborgarabúllu Tómasar. IK holdings er meðal eigenda Búllunnar.

Hvorki út fyrir lagaheimild né í andstöðu við stjórnarskrá

Í dóminum segir að Hæstiréttur hafi ekki fallist á það með IK holdings að með ákvæði í samþykktum húsfélagsins um að þessi kostnaður teldist sameiginlegur hefði það farið út fyrir heimildir sínar samkvæmt lögum um fjöleignarhús. 

Að sama skapi hafi ekki verið litið svo á að jafnræðis og meðalhófs hefði ekki verið gætt gagnvart IK holdings við ákvörðun húsgjalda að þessu leyti þannig að í bága færi við réttindi einkahlutafélagsins samkvæmt félagafrelsisákvæði stjórnarskrárinnar. 

Að fenginni þeirri niðurstöðu hafi komið til skoðunar hvort þinglýsing samþykkta húsfélagsins hefði verið skilyrði fyrir því að IK holdings yrði bundið af fyrrnefndu ákvæði þeirra. Ekki hafi verið fallist á að tilvísanir í þinglýstum eignaskiptayfirlýsingum hefðu með einhverjum hætti fullnægt kröfum laga til þinglýsingar samþykkta húsfélags. 

Hefði mátt vita af kostnaðinum

Á hinn bóginn hafi Hæstiréttur talið sannað að fyrirsvarsmaður IK holdings hefði þegar við kaup á eignarhluta félagsins vitað eða mátt vita að samþykktir húsfélagsins mæltu efnislega fyrir um að kostnaður af auglýsinga- og kynningarstarfsemi væri borinn uppi af eigendum sameiginlega og skipt samkvæmt ákveðnum hlutfallstölum. 

Gæti IK holdings því ekki borið fyrir sig að ákvæði samþykktanna á þessa leið hefðu ekki gildi gagnvart því. Húsfélagið hafi því verið sýknað af kröfum IK holdings um endurgreiðslu. 

IK holdings var gert að greiða Kringlunni þrjár milljónir króna í málskostnað á öllum dómstigum.