Matt­hildur Lilja kölluð inn í HM hópinn

Þetta kemur fram á heimasíðu Handknattleikssambands Íslands.

Andrea Jacobsen sleit liðband í ökkla á æfingu hjá sínu félagsliði í Þýskalandi, Blomberg-Lippe, í síðustu viku og ólíklegt að hún verði orðin klár fyrir heimsmeistaramótið.

Matthildur Lilja er annar leikmaður ÍR sem er í hópnum en varnarmaðurinn öflugi Katrín Tinna Jensdóttir er einnig í hópnum. ÍR-liðið hefur komið mikið á óvart í vetur og vann Íslandsmeistara Vals í síðasta leiknum fyrir HM-frí.

Matthildur er með 2,9 mörk og 2,4 stoðsendingar að meðaltali í leik í Olís-deild kvenna.

Hún hefur verið í æfingahóp áður og lék sinn fyrsta landsleik í Danmerkurferðinni á dögunum. Hún hefur því verið að taka stór skref á þessu tímabili og þetta er án efa það stærsta.

Stelpurnar okkar hefja undirbúning sinn í dag. Á föstudaginn ferðast hópurinn til Færeyja þar sem þær leika vináttulandsleik gegn heimakonum.

Ísland hefur leik á HM 26. nóvember gegn Þýskalandi.