Böngsum mun rigna á Króknum á föstu­daginn

Greint er frá þessu á Facebook-síðu Tindastóls þar sem fram kemur að þegar Tindastóll skorar sína fyrstu þriggja stiga körfu á föstudaginn verði öllum böngsum kastað inn á völlinn, líkt og þekkist erlendis og í öðrum íþróttagreinum.

Leikmenn Tindastóls munu svo gefa Einstökum börnum á Norðurlandi bangsana í Síkinu eftir leik, og svo á Akureyri á laugardaginn, en nánari upplýsingar um viðburðinn verða veittar síðar í vikunni.

Einstök börn er, eins og fram kemur á heimasíðu félagsins, stuðningsfélag barna og ungmenna með sjaldgæfa sjúkdóma eða sjaldgæf heilkenni og fjölskyldna þeirra. Félagið var stofnað 13. mars 1997 af foreldrum nokkurra barna en nú eru hátt í 900 fjölskyldur í félaginu eða um rétt um 2400 foreldrar og stjúpforeldrar.

Leikur Tindastóls og ÍA hefst klukkan 19:15 á föstudaginn. Stólarnir steinlágu gegn taplausu toppliði Grindavíkur í síðustu umferð og eru því fjórum stigum frá toppnum en nýliðar ÍA eru í 8. sæti eftir átta umferðir, sex stigum á eftir Tindastóli.