Fyrir­tæki Elds með málmana sem Trump girnist á Græn­landi

Í kvöldfréttum Sýnar voru rifjaðar upp myndir frá því í fyrra þegar gullframleiðsla hófst í Nalunaq-námu Amaroq á Suður-Grænlandi og fyrstu gullklumparnir voru steyptir. Um 220 manns starfa núna við vinnsluna.

Amaroq tilkynnti í haust um nýjan gullfund á svæði á Suðaustur-Grænlandi, sem gæti verið fimm til tíu sinnum stærri.

„Nalunaq-náman er tiltölulega lítil. Þegar hún er komin í fulla framleiðslu, þá er hún 50-60 þúsund únsur. Það er þó stórt á íslenskan mælikvarða. En þetta er svæði sem gæti haft framleiðslu upp á 300 til 500 þúsund únsur,“ segir Eldur Ólafsson, stofnandi og forstjóri málmleitarfélagsins Amaroq.

Frá núverandi gullnámu að þessari nýju er um hálfsdags sigling á báti en um 20 mínútna þyrluflug. Framundan er að meta nánar hversu stór nýja gullnáman er.

Eldur telur sig geta fullyrt að aldrei hafi fundist neitt viðlíka af gulli á Grænlandi. Stærðin og skalinn á þessu sé á við það stærsta sem fundist hafi í heiminum á síðustu 10-15 árum.

„Algjörlega einn af þessum toppum.“

Í síðasta mánuði birtist svo önnur stórfrétt af Amaroq þegar félagið tilkynnti um fund sjaldgæfra málma, germaníum og gallíum, í annarri námu, Black Angel, sem félagið keypti fyrr á árinu á Vestur-Grænlandi í samstarfi við danska og bandaríska sjóði.

„Og þetta er ein af fáum námum á vesturhveli sem getur útvegað germaníum og gallíum og við ætlum okkur auðvitað að reyna að koma þessari námu sem fyrst í gang,“ segir Eldur.

„Og það er gaman að segja frá því að árið 2027 sjáum við fyrir okkur að Nalunaq verði stærsti skattgreiðandi Grænlands. Þegar Black Angel verður byggt, þá verða þessar tvær námur, þær munu þá geta undirbyggt það að Grænlendingar verði ennþá meira efnahagslega sjálfstæðir.

Og það er einungis úr þessum tveimur námum og þá er ennþá hægt að taka á öllum þessum stóru verkefnum sem við erum að vinna í.“

Germaníum og gallíum hafa verið skilgreindir á Vesturlöndum sem þjóðaröryggismálmar.

„Þeir eru notaðir í gervigreindartækni, þeir eru notaðir í hernaði og tækni í kringum hernað. Og þeir eru notaðir í græna orku.

Þessir málmar eru það mikilvægir að ef þú átt þá ekki til, þá geturðu ekki búið til tækin og tólin sem við þurfum á að halda. Og þess vegna er þetta kalda stríð á milli þessara stórvelda um þessa málma.“

Og þessvegna skiptir Grænland máli, segir Eldur.

-Hafið þið orðið varir við það að Bandaríkjamenn og Bandaríkjastjórn séu að sniglast í kringum ykkur?

„Sko, við getum ekkert rætt það. Við erum bundin trúnaði. En við vissulega tökum þátt í öllum þeim umræðum, hvort sem það er í Evrópu, Danmörku eða Bandaríkjunum, út af okkar stöðu. Og viljum auðvitað bara styrkja það að Vesturlönd hafi þessa málma og þá getu til að taka málma úr jörðu.“

Á Þorláksmessu ítrekaði Donald Trump enn ósk sína um að Bandaríkin eignist Grænland.

„Við þurfum Grænland fyrir þjóðaröryggi,“ sagði Bandaríkjaforseti.

En þýðir þetta að fyrirtæki Elds er lent inni í hringiðu stórveldakapphlaups?

„Ég get ekki kommenterað mikið á það. En það skiptir máli. Það skiptir máli að þetta sé til staðar og skiptir máli að getan sé til staðar. Og við erum auðvitað að einhverju leyti komnir þar inn, því að það eru þar til gerðir sjóðir sem eiga í okkur sem sækja fé sitt beint frá ríkisfélögum og stofnunum. Þannig að það skiptir máli,“ svarar Eldur Ólafsson.

Fjallað var um gullævintýri Elds á Grænlandi í þættinum Ísland í dag í janúar: